反對修訂《逃犯條例》嘅行動逾演逾烈,行政會議成員湯家驊今(17日)出席電台節目時建議成立「真相與和解委員會」,委員會可向特首建議特赦名單。時事評論員陳雲生狠斥湯作為資深大律師,提出成立該委員會無疑添煩添亂,委員會可提出特赦名單更係越俎代庖,斷送法治。
湯家驊指出,雖然政府有權立法禁止市民喺重要地方集會,但政府要先宣布香港進入緊急狀況,咁做距離中央介入只係一步之遙,而佢創立嘅民主思路參考咗海外經驗,建議成立「真相與和解委員會」,有別於坊間爭取嘅獨立調查委員會,目的係要令社會復原,而唔係懲處任何人,相反委員會可以向特首建議特赦名單。
對於湯嘅建議,陳雲生直指現時反修例風波仍未平息,對方提出成立真相與和解委員會無疑係添煩添亂,尤其係若果有人犯法,必須提出檢控,經法庭審判係咪有罪再做判決,最後才由特首考慮基於乜嘢理由,係咪會特赦;但湯建議嘅委員員可以提出特赦名單根本是越俎代庖,令現時參與遊行嘅年輕人有不必要嘅期望,以為毋須承擔法律責任,更加有恃無恐,做出更激烈嘅行動。
陳狠批湯作為資深大律師,唔應該提出呢啲不負責任嘅言論,尤其佢係行政會議成員,會令人覺得佢提出有關意見,背後可能代表政府或某些人嘅意見,而中央政府多次表明現時反修例行動已演變成類似恐怖活動,若果日後真係變成恐怖活動,亦非特區政府所能處理,因此若該委員會提出特赦名單,而特區政府最終做唔到,等如令政府失去誠信。
湯家驊曾力撐修例,被問及佢呢番言論係咪為自己補鑊?陳雲生指佢所創立嘅民主思路,早前多名核心成員跳船,已四分五裂,若果用特赦名單來補鑊,卻令香港斷送法治,社會唔會接受。
東網網站 : https://on.cc/
東網Facebook專頁 : https://www.facebook.com/onccnews/