每年臨近農曆新年，唔少團體都會喺維多利亞公園擺攤位，賣吓嘢、寫吓揮春。但有團體今(19日)擺攤位嘅時候，就畀市民大鬧「大話精」喎，究竟做錯乜嘢，搞到市民咁唔畀面呢？
話說社會民主連線嘅梁國雄(長毛)同吳文遠擺街站嘅時候就開咪講嘢，其中吳文遠話希望市民放下黃藍之爭，唔好因為政治問題，搞到家庭破碎。佢又話今年市道唔好，冇人競投年宵攤位，所以社民連就租咗兩個位，仲聲稱會整連儂牆添！
其後長毛提醒大家過年唔好忘記被捕手足，聲稱大年初三會號召市民上街，反對警方加薪，又指現場攤位設有反對警察加薪嘅聯署活動，希望大家參與。點知，有市民行過，對住長毛大鬧：「收皮啦！大話精！」搞到場面一度尷尬，長毛就回應：「會繼續抗爭到底。」睇怕都係唔知衰啦！
東網網站 : https://on.cc/
東網Facebook專頁 : https://www.facebook.com/onccnews/
