今屆區選建制派大敗，民建聯4名身兼立法會議員嘅區議員競逐連任失敗，當中包括喺東涌南選區敗選嘅周浩鼎，而佢更加係現屆5位「超級區議員」當中唯一一位失去區議會議席嘅議員。不過即使經歷敗選，周浩鼎喺選後個幾星期都一直落區謝票，但有市民兜口兜面寸佢「從來都冇支持過你」！
呢日周浩鼎返到去服務咗4年嘅富東邨同裕東苑一帶謝票，佢同一班支持佢嘅市民有講有笑，仲話會繼續留喺呢一區服務大家。睇返選舉結果，其實今屆周浩鼎喺選票上都有近1500票嘅增長，落區多謝3600幾位投票支持過佢嘅選民都係無可厚非。
之但係，其實並唔係每個住喺嗰度嘅居民都對佢有好感。當周浩鼎笑住咁行去想多謝一位女士支持嘅時候，嗰位女士第一時間回敬咗一句「從來都冇支持過你」，兜口兜面寸周浩鼎自作多情。不過，做咗咁耐政治人物嘅周浩鼎，好早已經接受一定會有人唔鍾意佢嘅事實，依家失去咗「超級區議員」入場券嘅佢，唔知出年立法會選舉嘅時候點走位？
東網網站 : https://on.cc/
東網Facebook專頁 : https://www.facebook.com/onccnews/
