近排市民出街都戴返個口罩，市面上買到嘅口罩通常都係純色嘅，點解民協區議員何啟明戴嘅口罩會咁色彩繽紛嘅？
原來嗰個並唔係口罩，而係口罩套。何話將外科口罩套喺口罩套入面，就變咗個好靚嘅口罩喇！但佢都講到，始終隔多咗一層，所以用咗口罩套之後會比平時焗少少，而且每次用完之後都需要清洗，仲話用咗口罩套並唔能夠延長外科口罩嘅壽命，都係需要每日更換，所以真係純粹為咗美觀而用嘅。
至於呢個口罩套點嚟？佢話街坊親手車畀佢嘅，獨一無二，連民協入面都係得佢有添！
再睇真啲，呢個口罩套用咗粉紅色，上面仲有隻卡通熊仔，唔知佢收到之後有無掙扎過用唔用好呢？佢就提到自己本身都鍾意粉紅色，而且真係好靚，所以好鍾意用。查實早排係情人節，唔通呢份係情人節禮物？佢就話嗰個街坊係一位識咗好多年嘅姨姨，但就提到自己嘅議辦收咗好大盒朱古力，到依家都仲未食晒喎。
東網網站 : https://on.cc/
東網Facebook專頁 : https://www.facebook.com/onccnews/
