歌手恭碩良（Jun）到電台受訪，從芝加哥工作返港的他笑言現時還未校番好時差：「真係年紀大啦，身體適應能力變差，我已經夜晚10點瞓，但凌晨3點都彈起。」他又透露整個10月都留在錄音室寫歌：「本來諗住8月演唱會後休息，但作為音樂人要做好本分寫歌，依家都寫咗十幾隻歌。（幾時出歌？）我做音樂有少少唔同，公司係隨心畀我去做，好開心大家又buy我唱廣東歌，所以我會keep住做廣東歌，個個都想佔領其他市場，但都要有人睇住自己嘅市場，加上我又唔係國語人。」
他又透露下周會到澳洲探爸爸，會在當地過聖誕，但未知會否倒數，因要視乎稍後巡唱安排，他表示：「年頭計劃去嘅，去探爹哋，佢一把年紀，開始講啲奇怪嘢，話咩『阿仔，第時有咩嘢啲結他都係留畀你』（對上一次幾時番去？）2月，上隻碟我係喺澳洲寫，攞住部電腦喺coffee shop寫歌，今次都會咁樣做，寫吓隻碟嘅歌。」他又透露明年2月尾會在澳門開騷。
東網網站 : https://on.cc/
東網Facebook專頁 : https://www.facebook.com/onccnews/
