上期講到，兔兔眼見日圓創出近一年新低，就想換定YEN（日圓）等3、4月去日本賞櫻同Shopping。結果，兔兔好聽熊大話，喺每百日圓兌港元跌至7水平時就將部分港元換了YEN。
不過，由於天氣關係，今年日本櫻花的開花時間比上年早，所以佢上兩星期就已經買定去日本的機票同酒店。
新型冠狀病毒（前稱武漢肺炎）疫情持續爆發，唔少國家已經對香港實施封關措施，當地的航空公司亦停飛來往當地同香港的航班。
兔兔好傷心問熊大：熊大，如果我驚感染肺炎而想取消我個日本賞櫻+Shopping之旅，咁一早買定的機票同酒店係咪冇得退錢？
熊大：如果驚感染肺炎而唔想出發，呢個係屬於「個人因素」問題而取消行程，保險公司一般係不會賠償。話時話，兔兔，你買咗旅遊保險未？
兔兔：未呀。但如果旅遊保險唔可以就疫情問題提供保障，我仲買嚟做咩！？
熊大：其實唔一定㗎。如果你仔細睇保險公司的保單條款，部分情況下所造成的「行程取消」係可以獲得賠償的機會。
兔兔：咁如果當地突然封關唔畀我入境，呢種情況旅遊保險有冇得賠畀我先？
熊大：如果當地政府因為預防疫情而拒絕港人入境，目前市面上的旅遊保險計劃都冇提供有關限制入境（如被拒入境、未能取得簽證）而取消行程的保障。不過，部分保險公司可以安排受保人取消單次旅遊保單並退回保費，或者安排免費更改受保期（在原定受保期的3個月內），但係就要受保人提供旅遊的購票證明。而部分旅遊保險計劃亦可以就受保人在「行程取消」下提供合理解釋而向個別航空公司申請退回機票的費用，但詳情都要視乎相關機構安排。
熊大繼續說：一般旅遊保險有關「旅程取消」的保障，列出的條款均為「旅程預定出發日期前7天內，已計劃前往的旅程目的地發生傳染病，致使受保人不能展開旅程」，所以「被拒入境」一般唔包括喺受保障範圍內，除非呢個入境限制係因為當地已經爆發了傳染病。
兔兔：「被拒入境」就話唔喺保障範圍內，咁如果大吉利是我受感染病咗返唔到香港，旅遊保險又有冇得賠？
熊大：如果因懷疑染上新型冠狀病毒而被迫隔離，多數的旅遊保險都會因為「強制隔離」取消行程的原因，而按隔離日數去支付受保人「強制隔離現金津貼」。之但係唔同的保險公司產品條款各異，投保人應先向保險公司查詢。
熊大繼續說：不過點都好，旅遊保險一般都係越早買越好。因為越遲買會較易令投保者的保障受到限制。
兔兔：今時今日呢個時勢，旅遊前買旅遊保險都不失為一個盡量減低損失的理財方法。
最後，小編補充一句：大家購買旅遊保險前，記得留意保險內容的條款及細則，未預定旅程的就忍一忍手，等疫情穩定先再返「鄉下」啦。
