想影靚靚呃like打卡相？唔使下下用大相機嘅，只要識得拿捏好角度同日光，一部手機都可以影到唯美相。日前韓國當紅女團BLACKPINK就喺節目《芳心俘虜頻道》度教觀眾4招簡單得嚟又幾有特色嘅影相方法，基本上手殘一樣影得靚！
1. N胞胎照
呃like度：★★★（5★最高）
難易度：★★★
選用「全景」模式，從左到右影（或從右到左都得），主角姿勢要保持穩定不動，一路pan過去直至主角離開鏡頭，主角就要繞到攝影者身後，再走到另一邊位置企定，與此同時攝影者就慢慢跟住指示移動相機鏡頭。
想一個畫面有幾多個自己就重覆以上移動動作幾次，完成之後就會有一張好得意嘅全景圖㗎喇。
2. 懸浮移動照
呃like度：★★
難易度：★★★★★
「懸浮移動照」無論係拍攝者定入鏡嗰位都係需要少少技巧先會影得靚，影出嚟嘅效果會好似凌空瞬間移動咁，自問平時影開高難度相嘅你一定要試！不過事先聲明，少啲體力都唔掂！
拍攝者首先要用膠紙（或者任何可以喺屏幕記號嘅用具）喺畫面正中央整一個十字記號，相機要調教成連拍模式。
入鏡者需要原地向上跳起，跳完再向前行一步，再重覆跳起，每次位置都要跳喺十字記號位置。
影咗數十張相之後，揀晒每個距離懸浮空中嘅嗰一張相，其他刪除，連埋之後就好似你識得凌空移動，得意得嚟其實都有啲陰森……
3. 雨和陽光照
呃like度：★★★★★
難易度：★★★★
正式影相之前大家要準備遮（最好透明）同一支樽裝水，有齊呢兩樣法寶加埋風和日麗嘅景色，絕對充滿藝術性！
入鏡者需要眼明手快，因為要將樽裝水開蓋倒插落遮腳，之後要一下子舉起把遮，啲水就會開始好似落雨咁。
只要配合得好，呢張相係超級有意境，只係拍攝者會好辛苦，要抓緊有水嘅一刻，同埋要係咁加水囉。
4. 水晶球世界照
呃like度：★★★
難易度：★★
咁多個影相密技之中，呢個係最容易，因為你只需要一個水晶球就得。
將水晶球放喺畫面中央，而入鏡者就企中間，咁樣主角就會好似被收入水晶球嘅世界咁，相當有趣！
撰文：沙拉
