感染武漢肺炎嘅人數每日都有新增,好多人為咗自身安全及家人着想都會戴口罩出街,不過上咗年紀嘅人又未必咁諗,好似藝人陳家樂咁,佢出盡辦法叫嫲嫲戴口罩,但係嫲嫲堅持唔肯,搞到佢都冇晒計,仲話嬲到想同嫲嫲提早開年!
陳家樂喺社交網Po咗條片,見佢同嫲嫲去咗酒樓食飯,佢不停氹嫲嫲出街要戴口罩,不過嫲嫲諸多推搪,又話好焗、平時都冇乜戴,陳家樂同佢解釋情況唔同以前,戴番個罩安全啲,嫲嫲就話自己好少出街,最多都係落街市行個圈,總之就係唔肯戴,搞到陳家樂愈講愈激動,最後話:「你唔好咁曳啦!」條片就完咗。佢喺社交網留言話:「好火滾呀!😡😡😡講咗成個鐘都唔肯戴口罩!#再講就提早開年。」唔少網民都留言話好明白陳家樂嘅感受,面對老人家真係要用好多時間去勸去氹,仲有人提議用粉紅色嘅可愛得意面罩吸引嫲嫲戴!
東網網站 : https://on.cc/
東網Facebook專頁 : https://www.facebook.com/onccnews/