又到聖誕！又到聖誕！12月就到了，唔知今年仲有冇「聖誕鐘，買匯豐」呢支歌仔唱呢？
兔兔：熊大，點解成日都有人話「聖誕鐘，買匯豐」？係咪因為聖誕節有聖誕老人出現，所以匯豐的股價就有運行？
熊大：哈哈，「聖誕鐘，買匯豐」其實係一個傳統智慧嚟。臨近年尾，基金經理為了做好年結，達到「粉飾櫥窗」效果，就會買入一些大型藍籌股，例如匯豐（5），去帶動整體恒指表現。不過「聖誕鐘，買匯豐」呢支歌仔近幾年已經唱唔響，匯豐的股價在聖誕節前或後都冇一個明顯的升幅。
兔兔：講開匯豐，之前成日睇新聞話佢有回購計劃，其實咩係回購？
熊大：回購即係間公司喺市場上買返自己的股票，然後再將呢批股份註銷，令已發行的股數減少。股數減少，大股東的持股比重就會相對提高，其控股權就可以進一步加強；同時，發行股數減少，會令公司的每股盈利及資產淨值上升，市盈率會因此而下降，公司的投資價值就會變得更加吸引；或者公司用市場較高的價格收購股份，繼而令其股價上升，所以回購又被市場視為托高股價的一種訊號。
兔兔：既然回購係托高股價的手段，點解匯豐年初至今的股價托極都唔點升？
熊大：回購某程度上可以話係控制公司嘅股價，不過其實都有相關嘅規矩限制。例如，公司回購的股份數目不得超過公司已發行股本的10%；回購價唔可以比之前五個交易日的平均收市價高出5%或以上；在業績發布前一個月，公司唔可以進行回購等等。所以有時回購都未必一定可以托高股價。
熊大繼續說：其實一間公司之所以進行回購，係意味公司認為自己的股票價值被低估，希望市場藉其回購的舉動，對其股價增加信心。
兔兔：咁增持呢？同回購又有咩分別？
熊大：增持係大股東的個人行為，佢自己「掏荷包」買股票，同上市公司的資金冇關係。增持唔涉及註銷股份，當中只涉股份權益轉移，所以增持唔會影響已發行的股數。而增持同回購都有一共通點，就是兩者都係對公司的前景有信心，又或者覺得現價好抵買。兩者都可達到大股東鞏固控股權的目的。至於對股價係咪有刺激作用，就要視乎其他因素先至可以決定。
兔兔：照道理大股東對間公司最熟悉，連佢都覺得間公司的股票抵買，咁應該一定買得過啦！嘻嘻！
熊大：表面上可以咁講，不過有時候一間上市公司公布了一些負面新聞或者壞消息而拖累股價急跌，大股東都會出嚟增持股票，以示對公司的支持。但之後股價仲有冇力升， 就要睇市場點消化個負面消息了。
兔兔：噢！咁睇嚟一間公司如果愈回購股價愈跌，都係唔買好過買。（兔兔心諗，與其花錢買股票，不如留返錢畀佢自己Shopping仲好過啦！）
