無論為自己定為他人，今時今日出街一定要佩戴口罩，之不過當下口罩供應依然短缺，存貨有限嘅朋友難免會感到頭痕！面對如此窘境，設於日本長野縣小諸市嘅生活雜貨公司A.Y.Judie就諗到個頂檔方法，於4月7日推出名為「甚麼都變成口罩」嘅口罩帶。簡單介紹下呢款口罩帶，採用日本製嘅夾子及橡皮筋所構成，用法係將紗布等料甚至係紙巾摺成口罩Size，再利用口罩帶兩端嘅夾子夾住，就可以輕鬆變成一個簡易口罩，而且橡皮帶有彈性，無論男女都啱戴。不過大家要留意，該公司講到明，大家唔好對呢款簡易口罩可以減少病菌感染風險或預防敏感反應有所期待，但戴住個口罩，點都可以減少自己無意識用手擦口鼻，亦可減低自己嘅飛沫感染到其他人，喺「有罩好過無罩」嘅前提下，算係一個折衷辦法。「甚麼都變成口罩」口罩帶售800日圓（兩條），於即日起可於樂天Online Shop預約購買。
網址：https://item.rakuten.co.jp/ayjudie/s32-001/
東網網站 : https://on.cc/
東網Facebook專頁 : https://www.facebook.com/onccnews/
