藝人吳啟華與內地前妻石洋子育有一名女兒吳熙兒（豬豬），有女初長成，年僅11歲嘅豬豬愈大愈靚女，人仔細細已甚有表演欲，不時喺個人社交網大晒琴技，又識自拍P圖，嘟嘴扭腰表情多多，就連化妝都難唔到佢，多才多藝。目前微博Fans人數已超過2500，由於受到父母影響，自小已對娛樂圈充滿憧憬，最近更參與拍微電影，明顯有意向網紅之路出發。
有指錫女錫到燶嘅吳啟華，未能時常陪喺豬豬身邊，因此對阿女有求必應，每月豪花20萬人民幣（約港元22萬），畀前妻同囡囡做生活費，務求令女兒開心，認真廿四孝爸爸！兩父女感情相當不錯，豬豬亦曾上載與吳啟華嘅親密合照，為爸爸賀壽，十分乖女。
對於傳聞，東網聯絡上啟華，佢話：「誇張啫！幾多錢生活費就唔講啦！但做男人係要有呢個責任。」問到囡囡係咪有意入行？佢就話：「囡囡長大啦，有佢自己諗法，佢想點我都控制唔到，不過，佢好乖，有乜嘢事都會同我商量先。（囡囡入行就升呢星爸？）如果佢真係做演員都有着數嘅，知名度方面都打個底先，但我都係建議佢多啲學習，大個先諗做嘢啦！」
東網網站 : https://on.cc/
東網Facebook專頁 : https://www.facebook.com/onccnews/
