如果你覺得Marvel電影宇宙橫跨10年好史詩級，其實黃百鳴都有「開心系列」電影由80年代開始，由主演到執導。如果只計演出，也有《家有囍事》系列，由92年拍到2020年，「大佬」角色深入民心，只係「細佬」由不同演員演出，如果黃百鳴電影宇宙有復仇者聯盟，「常滿」就係Iron Man級數，「開心鬼」仲唔係雷神？今年新年期間開電視睇賀歲片，應該總有一兩套見到佢。
今年4月就74歲的黃百鳴，80年代是新藝城影業有限公司主席，1991至1993年再成立東方電影發行有限公司，是著名電影製作人。但其實早於1974年已經演出過電視劇《民間傳奇》，之後1981年電影《追女仔》亦客串汽車銷售員，82年《最佳拍檔》又演神父，再到84年開始就是「開心系列」，包括《開心鬼》五部曲，84年《開心鬼》、85年《開心鬼放暑假》、86年《開心鬼撞鬼》、90年《開心鬼救開心鬼》、91年《 開心鬼上錯身》。而「開心系列」原來還包括他執導的《開心樂園》、《開心魔法》、《開心魔法2》。 另外92年開始《家有囍事》，一直演「大佬」角色，「常滿」夠晒經典，拍到今年都還有2020年《家有囍事2020》演出「游永富」一角。而當中還有一套，2011年上映的《最強囍事》亦引來注目，因為黃百鳴一場泳池戲，被大家發現60幾歲都有腹肌，原來好fit。
