台灣馬拉松補給食物太澎湃文宣似足超市海報

對於香港嘅跑友來講，比賽補給有半隻蕉已經係皇恩浩蕩，有啲比賽有半粒燒賣、有一口牛肉，直頭可以見報! 反觀台灣，唔少比賽都以美食招徠，BBQ、燒豬、生果已經屬基本貨色，不過有場比賽嘅補給食物，就連台灣民眾都嚇一跳!

講緊嘅，係嘉義市國際管樂節系列活動「第四屆嘉義馬拉松」，由嘉義市政府主辦。或者因為係官方活動，所以補給食物絕對唔可以馬虎，除咗燒雞、豬腳呢啲重頭戲，啤酒都有5款，連埋台灣當地小食，隨時要食足42公里!

不過，台灣民眾似乎唔多受落，話唔應該將咁健康嘅活動，用啲咁唔健康嘅食物做招徠。甚至，有人見到張海報，就話似足超市宣傳單張，

台灣傳媒解釋，說台灣南部地區嘅比賽，都鍾意用食物去吸引參加者，仲話唔夠嘢食就唔會有人參加，所以嘉義呢場比賽用呢啲招數，都係向現實低頭。

就好似另一個喺嘉義舉行嘅半馬賽，亦都係用烤鴨同烤蝦去吸引人參加。

其他長跑比賽亦鍾意用呢一種做法。

第四屆嘉義馬拉松

講返呢場「第四屆嘉義馬拉松」，佢雖然咁多嘢食，不過報名費一啲都唔貴，而家報緊名，聖誕新年去開台灣不妨順便觀摩一下。

日期: 12月29日 (星期日)
地點: 嘉義市民生國中
項目
全馬: 限時7小時，報名費600台幣 (約151港幣)
- 半馬: 限時3.5小時，報名費500台幣 (約126港幣)
- 10K: 限時2.5小時，報名費400台幣 (約100港幣)
報名連結
按: 海外選手可用信用卡繳費，並在起點領取選手包