中港藝人，送中風波
中國大陸十三億人，市場咁大，香港藝人北上搵食真係無可厚非嘅，唔通真係犯法咩？不過呢，每次只要港中兩地出現社會矛盾、政治問題，總會有唔少中港藝人喺微博發言受到大量關注，當中有中國網民大讚愛國，亦都有指罵中港藝人反中亂港，唔值得中國人民支持咁話。眾所周知，香港自6月起「反送中」逃犯修訂條例引起咗一場備受國際關注嘅社會運動，中港嘅藝人都無法置身事外，佢哋一言一行，微博網友都相當留意，有讚有彈。今日就等DailyView用網路大數據話你知，到底有邊幾個藝人最受佢哋關注同討論喇！
DV小教室：網路溫度計透過《KEYPO大數據關鍵引擎》大調查觀測咗近萬個網站頻道（而且不斷增加ing），包括港澳地區的新聞頻道、FB、IG同埋各大討論區、Blog……透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
5 李佳芯（731筆）
——扭曲的是人心
香港TVB藝員李佳芯，青春美麗，係好多人眼中嘅女神，令人痛心嘅係，今次佢因為微博嘅Post而被中國網民批評。事關佢6月果陣喺微博到話，「有時候，扭曲了的不是世界、是人心」。又喺IG到講，叫大家快手登記做選民，盡返公民責任。李佳芯嘅言辭絕對係和平、理性同非暴力。但係呢，中國網民話佢支持示威者，撐港獨，認真對號入座，佢只好澄清絕無撐港獨意思。
image source:IG／aliaime
4 倪晨曦（806筆）
——唔好斷章取義
喺中國南京出世嘅Elva，倪晨曦喺6月14號FB出咗個Post，話對香港呢一周發生嘅事好心痛，仲話為站出嚟發聲嘅人感到驕傲喎！香港網民大讚，但引嚟大陸網民微博批評佢唔愛國。不過呢，Elva就無有怕，喺8月21號重申自己無講過港獨同支持暴力，但就被人斷章取義，叫佢哋自動離開。佢仲上傳埋李嘉誠喺《信報》同《商報》嘅廣告，叫大家唔好亂下定論，相當勇敢。
image source:IG／misselvani
3 周柏豪（2050筆）
——誓不低頭
周柏豪係香港型男，網民戲稱佢為「比比鳥頭」代表，認真有魅力。佢喺7月就出過Post要大家登記做選民，一盡做香港人嘅公民責任。內地網民見到佢嘅發言，成堆人就去佢微博留言，話對佢相當失望，估唔到佢咁唔愛國。但係周柏豪好有骨氣，並無因為呢種事認錯，仲喺8月9號清空自己嘅IG表態。香港網民就力讚周柏豪係真香港人，話以後都要好好支持佢。
image source:FB／周柏豪 Pakho Chau
2 佘詩曼（4699筆）
——愛國反港獨
佘詩曼係香港嘅實力派女演員，深受香港人愛戴，近呢幾年北上拍劇，都相當受歡迎。不過呢，佢就喺6月爆咗單「點讚」事件，因為佢被中國大陸網民發現，佢竟然係社交網站Like咗張反送中嘅相！咁大件事，網民就喺微博大罵特罵，揚言唔再睇佢嘅劇集。佘詩曼喺8月15號，喺微博表明自己係愛國愛港，「香港永遠是中國的一部分」，希望社會早日回復和平。
image source:FB／佘詩曼 Charmaine Sheh
1 楊千嬅（8304筆）
——明天會更好
香港烈女楊千嬅，唱得又演得，大笑姑婆真性情形象深入港人之心。喺6月果陣，香港「反送中」黃衫人不慎墮樓身亡，楊千嬅當時IG都有出文以R.I.P悼念，香港網民自然相當支持。但之後該Post文唔見咗，而中國網民又話佢係「港獨藝人」，去到8月14號楊千嬅嘅經紀公司「正向文化娛樂」發表聲明，指楊千嬅一心擁護基本法，香港係中國嘅，「相信明天會更好」。
image source:IG／eungchinwah
5 鍾鎮濤（3976筆）
——九唔搭八
人稱「B哥」嘅香港藝人鍾鎮濤，喺6月30號冒著風雨，參加咗撐警集會，仲上台發表講話，指責香港示威嘅年輕人「九唔搭八」，表態支持香港警察執法。香港網民見到佢咁講，即發起要罷睇佢有份參演，就快上嘅《花椒之味》。不過有人反對，自然都有人支持，好多中國網民喺微博紛紛表示，話鍾鎮濤愛國愛港，真係真正嘅中國人，一定要多多支持！
image source:IG／bggkenny
4 劉亦菲（7166筆）
——搶救花木蘭
中國大陸女星劉亦菲，喺8月用微博轉貼咗中國《人民日報》對香港反送中運動嘅言論，同時表態話自己「我也支持香港警察」，引起兩極反應。外國媒體以至香港網民都好嬲，話要抵制佢明年新片《花木蘭》咁話。但係呢，中國方面發起「挺花木蘭」串連，中國大陸網民強力支持，《環球時報》就話如果迪士尼要換角，就會損失中國市場，要三思而後行。
image source:IG／lyf.cc
3 梁家輝（15698筆）
——力撐香港警察
6月30號，香港民眾發起「撐警集會」，唔少藝人都冒住風雨參加，其中最突出嘅，要數梁家輝手持「阿Sir，我撐您！」嘅牌，相當強烈咁講咗佢嘅政治立場。佢仲要走入人群當中，一一向各位同志握手致意，叫各位要好好加油。「香港警察，絕對值得支持。」香港網民批評佢，中國網民喺微博力撐佢，相信佢執導嘅「深夜食堂」都會得到中國人嘅支持。
image source:FB／Tony Leung Ka Fai 梁家輝
2 肥媽（26609筆）
——爆喊唔撐警
瑪俐亞「肥媽」，曾經參加6月30號嘅「撐警集會」，佢上台激動咁發言，仲喊哂口咁話，要支持返值得支持嘅候選人，大家都要投票。佢又話示威者俾人教壞，要心平氣和嘅表達意見，呢番言論係微博受到力撐。但係到咗7月21號元朗白衫人無差別攻擊市民嘅恐怖襲擊之後，肥媽再次喊哂口咁話自己無撐警，叫特首要解決問題，搞返好個香港，希望事情有轉機。
image source:FB／肥媽 Maria cordero
1 譚詠麟（46929筆）
——望香港回復和平
香港樂壇老前輩，人稱「譚校長」，多年來歌盡無數金曲。早前6月30號，佢都有參加「撐警集會」，有香港網民話要同佢割蓆，亦有中國網民力撐佢敢言。而喺8月22號，佢慶祝生日，仲喺微博留言話：「祝願我們的祖國和家園中國與香港不受外來勢力的影響，早日回復安定繁榮！」又提出「家和萬事興」。佢嘅言論，深受中國網民愛戴，紛紛留言話佢愛國愛港。
image source:IG／alantam25
分析說明：
本研究資料由《KEYPO大數據關鍵引擎》提供，分析時間範圍為2019年06月08日至2019年08月22日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『因送中而爆紅藝人 』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
