對而家年輕一代嚟講，打機「課金」乃正常不過的事。唔少人為咗「升呢」過關，都會課金買吓道具。表面上，打機課金好似好敗家，不過今時今日網絡世界的虛擬貨幣其實可以好值錢，單睇加密貨幣（Cryptocurrency）的表表者「比特幣」（Bitcoin）由本身唔值錢可以炒到每比特幣值兩萬美元（發生喺2017年12月），你就知加密貨幣有無限可能性！
原來熊大（Lv 1000）都鍾意打機，最近佢玩《LINE Chef》過唔到關的時候就會課金買吓道具。不過兔兔（Lv 0）就擔心佢沉迷打機，第日會課金課上癮。
熊大：表面上我係打機，實際上我係想賺多啲錢畀兔兔大人你去Shopping。
兔兔：嗯？！（表面上質問熊大，實際上係暗爽）
熊大：兔兔大人，你有冇聽過加密貨幣？
兔兔：我有聽過Bitcoin，不過其實我都唔係好知係咩嚟！
熊大：加密貨幣係呢一代最Hit的投資產品，主要利用P2P方式傳送。最為人熟識的比特幣（Bitcoin），由本身唔值錢試過炒到去每個比特幣值兩萬美元嘅高位。今時今日，加密貨幣呢個市場已經發展得好成熟，種類超過2,000種，除了Bitcoin，仲有瑞波幣（Ripple）、以太幣（又稱以太坊，Ethereum）等。
兔兔：咁加密貨幣係點投資㗎？對住部機撳撳吓就有錢賺？
熊大：最先成立的加密貨幣係Bitcoin，呢種貨幣的開採原理係利用區塊鏈（Block Chain）透過複雜的運算模式而成。簡單啲講，每位比特幣的開採人會利用電腦解答加密數學問題的同時，會開設一個比特幣位址，由27至34個英文或數字組成，再配合密碼，個用法就好似日常生活中的銀行提款卡同密碼咁。而對呢個交易進行驗證並加到區塊鏈的過程，就稱之為挖礦。挖礦成功後就可以獲得比特幣。
熊大續說：比特幣成立初期一啲都唔值錢，原因係佢唔可以好似真實貨幣咁拎去買嘢。不過喺2010年5月22日，有個美國人提出用一萬個比特幣（當時市值相當於41美元）買兩個薄餅，成為了全球第一宗以加密貨幣購入實質貨物的交易。之後，比特幣就開始受到人關注，亦有不同平台接受了比特幣付款。市場上愈來愈多人挖礦，比特幣市值就愈升愈有，到了2017年12月，一個比特幣市值升至高近20,000美元，相當誇張。
兔兔：咁比特幣有冇供應上限？不斷挖礦就可以不斷生產比特幣？
熊大：本身比特幣有近2,100萬個供應上限。呢一刻不斷挖礦的確可以不斷生產比特幣，但由於供應量有上限，而家挖得愈多，將來挖到的就會愈少。而市場對比特幣需求一直欠缺彈性，令到其價格波動性好大。
熊大續說：由於價格波動性好大，投資比特幣有一定風險。你諗下，十年前用一個比特幣只買到一杯咖啡，十年後一個比特幣可能買到1,000杯咖啡，又或者一杯咖啡都買唔到。從經濟學角度去睇，投資比特幣其實係「博傻理論（greater fool theory）」。比特幣屬虛擬貨幣，本身應該係一文不值，之所以有人願意以更高價去買，係因為佢哋預期日後將有人出更高價買走。呢種投機行為等同零和遊戲，一旦冇「下家」出更高價買，原先買家所買下的比特幣價值就等同零。投資虛擬貨幣，分分鐘一年賺個double，又或者輸「凸」。睇吓比特幣今年最高位（每個近12,000美元）、最低位（每個近8,150美元）差咁遠就會明白！
兔兔：嘩！原來投資虛擬貨幣咁大風險，熊大你都要小心。
熊大：放心，我唔會貿貿然在二級市場高價買入比特幣。你見我成日對住部機，除咗打機，都是想挖礦賺吓錢。值得一提係，加密貨幣喺社會上認受性不斷擴大，唔同地方都推出自己的代幣。現時加密貨幣已深受世界各地的重視，話唔定有日大家買嘢食嘢都可以用加密貨幣畀錢！
結果，第日兔兔偷偷地將熊大在遊戲世界的虛擬貨幣轉售到二手平台，咁樣熊大冇得打機之餘，兔兔又有本金去Shopping，熊大今次真係GG了。
