歌手林奕匡（Phil）今日到新城電台宣傳新歌《黑方格》，問到可有趁機拉票，叫Fans投自己歌？他大方笑話唔介意Fans投其他歌手：「今年放咗好長時間，又去美國進修，作品都比較少，下年重錘出擊出新碟。（咁倒自己米？）係呼籲大家投自己鍾意嘅歌。（太太李靄璣唔投你會唔會嬲？）唔會，咁女歌手都冇得投林奕匡啦，哈哈！佢投邊個都冇所謂。」
Phil繼而介紹新歌，表示今次花盡心思，MV方面亦作出大膽新嘗試：「同個Model一樣都係油晒黑油，因為要赤裸上半身，所以都唔食咁多嘢，但現場太凍，最後都忍唔住食。（淨係赤裸上半身？）下半身着咗條貼身褲，想營造影子嘅效果，但最麻煩係啲油好難洗，我着住件衫返屋企洗，一除衫啲油係乾晒，變成碎片咁裂開，最後沖涼都沖成大半個鐘。（唔叫太太幫手沖？）佢瞓咗啦，第二日仲要花時間洗番乾淨個廁所，連天花板都有油漆。」
東網網站 : https://on.cc/
東網Facebook專頁 : https://www.facebook.com/onccnews/
