「熊細」（熊大細個時別名）細細個已經有個兔仔錢罌（原來熊大一早已經迷戀兔兔），佢亦好聽熊爸爸話，識得將利是的錢放入去做儲蓄。熊大家族遍佈世界各地（因為各國都有LINE FRIENDS Store嘛），熊細每年都會收到唔同國家的利是錢，當中以人民幣的佔比最多（因為內地曾經有多達7間LINE FRIENDS Store）。
轉眼間，熊細已經長大成熊大，兔仔錢罌都幾乎儲到滿瀉。熊大眼見人民幣匯價呢一年係咁跌，儲人民幣似乎冇咩著數，就想打爛個兔仔錢罌，將入面的人民幣做定期存款，即使人民幣繼續跌，起碼可以鎖定利息回報。
目前市面上有唔少銀行推出高息的人民幣定存計劃（資料截至9月12日），例如上海商業銀行，10萬元人民幣做一年定存就有2.9厘利息；入場門檻低一點的話，永隆1萬元人民幣做一年定存就有2.7厘利息；大新2萬元人民幣做3個月定存亦有2.4厘息。
熊大覺得人民幣定存好吸引，就想打爛兔仔錢罌。正當想打爛之際……
熊爸爸：熊大，你做咩要打爛由細儲到大的兔仔錢罌？
熊大：我見人民幣係咁跌，與其放喺度等蝕，倒不如拎去做定存賺息。
熊爸爸：但你有冇諗過如果人民幣匯價繼續跌，做人民幣定存反而會「賺息蝕價」？熊大，首先你要搞清楚人民幣貶值的原因。人民幣近期急跌其實係中國反擊美國將貿易戰升級的手段。而人民幣跌穿「七算」，預期仲會進一步貶值。睇翻近5年數據，人民幣兩次跌近七算，但就冇跌穿過。今次跌穿七算，創2008年3月以來新低。如果中美談判一直冇進展，人民幣應該仲有得跌。
熊大：但我冇理由明知人民幣繼續跌都唔做對沖！
熊爸爸：其實對沖人民幣貶值，除了做定存，仲有好多方法。例如將人民幣轉換成港元，投資喺藍籌股上，中長線回報可能仲吸引。早輪股市經歷急跌，唔少藍籌股現價股息高近5厘。
熊大：但買股票始終有股價下跌的風險。熊爸爸你會唔會有其他更穩陣的建議？
熊爸爸：或者可以投資喺其他有升值潛力的貨幣，又或係買黃金。人民幣貶值，觸發內地大媽搶金潮。近期黃金需求急升，推動金價升至每盎司1,550美元。環球低息環境下，預期金價仲有得升，買金去對沖人民幣貶值就最適合不過，嚟緊金價升至每盎司1,600美元應該問題不大。
既然揸人民幣咁唔划算，熊大第二日就打爛個兔仔錢罌，將入面的人民幣買晒周大福的LINE FRIENDS金飾，一嚟可以支持下自己的聯乘產品，二嚟買金又有保值作用，絕對好過內地網紅教人買入新鮮豬肉保值啦。
