無綫重頭劇《法證先鋒IV》正在熱播中，第二單元嘅小丑伏屍案於終於告一段落。而藝人張彥博（Bob）於劇中飾演一個忠心手下為大佬報仇，但其實暗地遭對方出賣，令觀眾睇到心寒又心痛。好多網友都大讚佢演技大躍進，憑「蝦條」一角成功突破以往乖乖仔形象，鮮少扮演奸角嘅Bob表示事前做足功課「學習」：「今次係我第一次做反派，多謝小青姐畀機會我，收到劇本後我睇咗好多殺人嘅戲，每晚都照鏡練習，用咗好多時間揣摩角色。拍之前都好驚演反派會唔會有反效果，但亦好想挑戰自我。」
Bob仲分享鏡頭背後趣事：「我同朱晨麗有一場打戲，嗰場戲其實好趕，因為要喺天黑前拍晒，最特別係朱朱要着高踭鞋踢我，雖然有護墊打底，但佢有幾吓踢唔準，我個肋骨位瘀晒，呢場都幾難忘。」佢又稱多得兩位前輩譚俊彦及黃浩然提點。
東網網站 : https://on.cc/
東網Facebook專頁 : https://www.facebook.com/onccnews/
