八月以來，催淚煙快要飄勻十八區，少女盲眼、被捕人數升至近 800人，街頭抗爭面對警察臥底與福建幫暴力威脅，「勇武」路線似乎越走越難。始終對「和理非」有最強號召力的民陣，幾經波折爭取到8.18維園合法集會，眾人期待這是繼 6.16 二百萬人上街後再一次的全民「曬冷」表態：究竟在連串流血受傷、擲磚縱火後，仍有幾多香港人繼續走出來堅守五大訴求？
也許不反對通知書越發難得，在 8.18 前數天，由連登至各個親友間的 Whatsapp 群組內都廣傳一則號稱是「百萬人遊行共識」的短文，強調 8 月 18 日是「純和理非主場」，要求參加者遵守三大共識：唔著 gear、遊行後沒下場、唔霸路、唔掉嘢。
一時間，「唔好衝」、「衝就係鬼」、「著 full gear 嚇親和理非」的講法又湧現。部份「勇武」覺得被排擠，原本陪伴香港人兩個月的「抗爭三寶」：口罩、頭盔、護目鏡，忽然好像千夫所指。8.18 戴定唔戴、著唔著黑衫，在很多群組掀起討論。
Full gear 心聲：「再捉鬼我哋會輸」
8.18 正午，黑衣青年黃先生在維園集會未正式開始時已 full gear 到場。烈日當空、四周和平，他的打扮引來不少注目。
他強調所謂gear只是保護裝備，「唔代表我哋要衝」；又同意 8.18 應盡量堅守和理非原則，「如果今日有人衝擊，我估大家都會想阻止嘅。但無人知道未來會發生咩事，唔知幾時會有防暴無啦啦揸架車衝入嚟，無理由企定俾佢打。其實要著齊所有 gear 至少都要五分鐘，有事才著反應唔切的。」
另一原因是為了以全黑 black bloc 打扮掩護同行者，「因為我都幾肯定會有其他人戴裝備。如果太少人戴，就掩護唔到。我 6.12 之後已經淘咗豬嘴返嚟，但早期少人戴，搞到我都唔敢戴，最近先多啲人一齊戴。」他認為戴齊防護裝備是好習慣，如果再污名化 full gear 的人是種倒退：「係退返到 2014 年，大家掛住捉鬼、割席，搞到無疾而終。」
他不同意 black bloc 會令臥底更易混入，「就算大家唔著 gear 著彩色衫，佢哋都照樣可以混入來，引起哄動去引其他人衝擊，哩啲事佢著彩色都做到。」「捉鬼捉唔晒的，反而令到示威者對同路人無咗信任。好似今日大家咁多懷疑目光望住我，都令我心底唔好受。上個月的文宣仲話見到『勇武』會安心、覺得係保護大家，點解而家大家又要驚咗『勇武』、驚咗戴裝備嘅人？」
他又提出不應再有「和理非」和「勇武」之分，「我好相信每個所謂勇武派原本都是和理非，而每一個和理非原本都是港豬嚟。如果再將人分門分派，今日叫和理非（集會），係咪勇武就唔好出來？到另一日大家想做勇武，係咪和理非就完全唔幫手？唔係架嘛。我哋應該作為抗爭者嘅整體去行動，而唔係分門分派去割席，哩個係雨革當年嘅失敗原因。如果我哋再係咁，距離輸就越來越近。」
沒多久，有人在維園拍到參與者舉起這標語，身型有點像黃先生，black bloc 之下無法辨認，但他們想法是一樣的。
網上圖片
核彈都唔割？「因為大家訴求係一樣」
究竟「和理非」是否像一些網上言論般排斥「勇武」、覺得他們會破壞維園和平集會？記者昨日在維園一帶訪問了大半天，那是在烈日和暴雨下堅持留守、或迫進維園合法集會的一群，有理由相信是核心和理非人士。記者更刻意選一些不穿黑衣、無gear、觀感十分「和理非」的市民訪問，都無法找到有人對勇武前線持「割席」態度。
四十來歲的主婦鄭小姐從 4.28 開始便參與多次「和理非」遊行，對上一次是7.1。她不認同擲磚放火是好方法，因可能傷及無辜，「但我都理解點解佢哋會變成咁，亦唔會割席，因為大家嘅訴求係一樣。」
對於有衝擊或示威者用武力可能會令和平集會難以繼續，鄭小姐認為責任在警方：「除咗市民參加集會要守法之外，警方都要跟法律架嘛。如果話有人用暴力就唔俾其他人遊行，係對其他市民唔公平。同埋警察係可以嚟維持秩序，但近日的遊行佢哋又無做，相反建制的遊行佢哋就做，咁唔係公平執法囉，唔係法治，係偏私。」
鄭小姐
一對看似七十多歲的老夫妻起初樂意受訪，但聽到記者問及會否覺得示威者「激進」、「暴力」，就顯得不耐煩：「唔覺喎，我淨係見警察將人塊面壓落地下磨，見晒骨呀！」「我尊重佢哋（勇武）架，佢哋鍾意點做就點做囉，佢哋一定唔會打我哋架。」「無警察出現就安全架喇！」「如果佢（林鄭）接受我哋訴求咪得囉，自然無咩好拗。」
中年陪月員：我同淺黃割席
集會場內不少人在衣服貼上「核彈都唔割」的貼紙，當中也有一些中老年人。
黃小姐 50 歲，做陪月，每逢周日或平日夜晚有事都會落場，不管是否有不反對通知書。「我係和理非，其實一啲都唔覺得出來會危險，我哋又唔係拎武器做壞事。掉返轉頭如果我哋唔出來，後生仔就好危險喇。」她除了簡單口罩外沒有裝備，如果放催淚彈就避走，落場是「充人頭」，覺得無論面對警察或有「鬼」生事，人數多都會令抗爭者整體較安全；亦要展示給政府知道，市民不會因為它打壓就不出來。
眼見部份抗爭手段轉趨激進，她不會阻止，亦不覺得示威者至今有做過超出她道德底線的事，「講真如果無佢哋做咁多嘢，都唔知個政府同警察咁黑暗，係佢哋將啲黑暗逐層逐層揭出來。」說著更一度落淚，「唔會呀，我唔會割席，我只會怪自己唔夠勇氣囉，太多包袱，後生啲嘅話，我都會勇武。」
問及身邊會否有「淺黃」朋友、覺得訴求正確但否定勇武行為，黃小姐說：「如果好和平就得，六月、七月時已經得咗啦。」她說身邊七成是藍絲，無所謂「淺黃」，「如果你睇到咁殘忍嘅場面都唔出嚟，咁仲唔係藍？我個人立場係咁囉，淺黃我都割席架喇。」
「個個星期 200 萬人出嚟、定掟磚好？」
有別於藍絲「總之犯法就唔啱」，昨日受訪的「和理非」對激進行為若有不認同，出發點傾向是從前線處境或運動成效作考慮。
吳先生夫婦和友人何小姐一同參與維園集會，他們只有申請到不反對通知書的場合才會出來，對上一次參與是6.16二百萬人遊行。「唔合法就盡量避免做囉，因為屋企人會擔心。」吳太說。但他們不會覺得佔路行為有問題：「無可避免架，人多自然惟有行出去，我哋都想係正正經經咁行出去架，但唔肯批嘛。」
至於擲磚放火等，他們立場是「無話割席或者支持」。「我覺得問題係太激進的手法會令有班人睇唔到、或唔明佢哋做緊啲乜。合法地做的話，起碼唔會俾個話柄人囉。」吳太說。吳先生補充：「你話新聞報個個星期200萬人出嚟、定係個個星期掟磚好？梗係個個星期200萬好啦。」他們覺得激進手法會模糊焦點，令其他市民只見到警民衝突、見不到五大訴求；也相信見到抗爭收效需要時間。
吳先生夫婦
何小姐則擔心前線犧牲自己生命和前途，但換不來任何成果，「如果你犧牲五年係換取到，咁都可以諗吓。但擲完俾人拉、俾人影晒，又無結果，唔好咁樣犧牲啦。講真六四死咗咁多人，到而家都係乜都無，我覺得生命可貴啲囉。」三十來歲的她，為此觀點而自嘲「廢老」。
對於遊行集會可能有「鬼」，他們並不擔心，「都預咗有啦。」吳太說：「你見到佢哋行徑係無乜必要就挑動人，『打佢啦』、『吊起佢啦』。」何小姐也認為可從行為分辨，而「鬼」不一定戴裝備，「我唔贊成因為個人嘅外觀同年齡就去標籤人囉。」
退休女士：接受勇武的過程
然而亦有「和理非」表示最初見到 full gear 蒙面示威者感到害怕。已退休的盧女士和蘇女士昨日結伴到維園，盧女士初時提及，8月3日朋友見到示威者在紅隧口堵路，「有個黑衫拎住支大棍、兇神惡煞咁，嗰啲就真係鬼嚟既；但跟住有啲黑衫女仔又拎返開啲雪糕筒，俾返啲車過，所以其實黑衫人裡面都有正有邪囉。」但蘇女士聽了插口說：「未必係鬼，或者有啲係過激都唔定，每個人唔同，都有自己嘅諗法。」盧女士則說：「唉，唔知啦。聽講嗰段時間已經有『鬼』混入嚟啦嘛。」
盧女士的取態是昨日受訪者中最接近割席的一個，較容易從「有鬼」的角度解讀激進行為。「我好早期在 Sogo 門口，見到兩個男仔，好高大，蒙晒面，都有啲驚，不過佢地好施文嘅。咁我朋友話唔洗驚，佢哋係去衝擊啫。而家我都習慣咗。」
蘇女士亦說見到 full gear 年輕人會覺得「驚」，因為這些防護裝備已經跟流血衝突的記憶扣連，讓她覺得又會有年輕人被拉、被打、受傷。她自問生於黃金時代，「唔係唔辛苦，但當時只要肯做，都有個安定環境、自由空氣可以吸到。但而家啲後生仔可能無咁嘅機會，所以不惜代價都要去做。我無聽過前線嘅心聲，所以都唔敢批評佢哋，係好擔心囉。」
她明言不會割席，「可能自己心底都好佩服佢哋嘅勇氣。但我都希望佢哋冷靜時可以諗返，所做嘅嘢有無反效果呢？如果唔係，再激化落去時，可能佢哋會好孤軍作戰。」在她看來，最好的方法還是不斷遊行，「無人去消費，佢經濟唔好、市面唔好，政府就一定要解決。只係遊行佢亦都無藉口拉你，不過今晚可能都有啲事，夏愨道又出晒馬路。」盧女士說：「希望佢哋今晚真係唔好衝啦，唔著數呀對佢哋，會係一個陰謀。」她最擔心有南亞人搞事，釀成激烈衝突就出水炮車、甚至解放軍介入。
盧女士的擔憂最終沒有發生。雖說參與維園集會的市民，很多都對事前網上廣傳的「純和理非主場」呼籲沒大感覺，但 8.18 的事態，最終卻朝「和理非」方向發展。不單連登討論區出現大量呼籲撤退的帖文（如「突發！屋企要人」），到晚上在金鐘一帶，甚至有一批全黑衫褲、full gear 的示威者結伴大喊：「返屋企！」結果夏愨道上的示威者全部於深夜時分撤離，剛過去的周六、周日也成了近月罕見的「無煙周末」。
當「和理非」支持「勇武派」，甚至聲言「核彈都唔割」，「勇武派」反而呼籲要保住「和理非」遊行的成果，勿讓衝突改變 8.18 焦點……看似很矛盾的現象，究竟是怎樣發生的？
（下篇待續）
文／林茵
守護言論與新聞自由。立場新聞，寸步不退。
每月贊助支持立場新聞
