張建聲去年中首部監製和主演的電影《作家的謊言—筆忠誘罪》上映，遇着社會運動令票房失利，之後他索性開發搵錢門路，跟喇英夾份投資7位數在葵涌開設工作室，自用之餘兼分租畀其他拍攝單位，結果又碰上新冠肺炎，阿聲坦承覺得是人生谷底，為免白交租，喇英想到變陣改做共享室間分租，有望止蝕，而他們又積極搞創作，希望為將來巿道復蘇做好準備。撰文：杜淑霞 攝影：李維隆
最初阿聲興起搞工作室念頭，全因去年嘗試做監製開始，「拍戲租開場地都知幾貴，好似租便利店或者士多，兩、三個鐘都要當一日咁租，小弟監製完，阿英做開導演都知幾花錢，但啲錢可以留喺第二個位度用，倒不如我哋自己成立一個for拍攝用途多啲嘅studio，陳設定啲景，畀自己拍攝，亦都可以租畀業界。」
怎料繼社運後再遇上疫情，令他們大失預算，阿聲說：「小弟已經有個重擊，《作家的謊言—筆忠誘罪》票房真係麻麻，再到我哋租咗呢度，裝修差唔多完成，諗住開嘅時候，疫情爆發，呢個直情係我人生谷底，（阿英：走都走唔甩）我哋落晒搭，我哋都係做啲正職啫，點解要咁樣對我！So what！咁就死點算呢！」
幸好畀阿英想到轉型共享空間分租，至少不用白交租，阿英說：「我哋呢行好多都係freelance，都想有個地方擺吓嘢，或者聚埋一齊有個地方做嘢，將個地方分租畀人，而大家做緊唔同行業，有個地方做嘢之餘，又可以將個網絡擴大。」趁這個搵租客階段，兩人同時繼續努力搞創作，為將來準備，阿聲說：「難聽啲講，革命時期又好，瘟疫時期又好，文藝復興特別勁，冇嘢做創作靈感特別多，大家度多啲嘢，等疫情冇嘢，巿道好番，就可以出去搵機會。」
