自己一個人「毒」在家中，都會選擇頹煮即食麵或者開罐頭撈飯。不過偶爾都想頹得嚟又有啲新意。CONY收到風，印尼營多嘅鹹蛋黃撈麵近期登陸香港，仲有韓國專出即食蟹膏嘅YDK早排亦都推出咗蟹膏醬加龍蝦肉呢個豪華配搭，等CONY即刻幫大家試試佢！
黃金撈麵
無論你讀緊大、中、小學，定係依家出嚟做緊嘢，營多喺咁多款即食麵當中，總會佔咗你心目中一個位置。食咗咁多年原味，估唔到佢竟然會出新口味！仲係近年好興嘅鹹蛋味，由鹹蛋黃味粉取代炸蒜與蒜粉，風味完全唔同。其實整體味道唔錯，而且辣辣地，幾惹味。不過鹹蛋味道不算突出，大家唔好抱太大期望，反而咖哩味比較重。
超豪罐頭
講到罐頭，大家都會覺得好頹，但韓國近年好興嘅即食蟹膏醬，就豪氣得多。呢款蟹膏醬仲加入53%真龍蝦肉，食落更有口感，而且蟹膏味道依然香濃，鹹鮮十足。除咗可以用嚟撈飯，仲可以撈麵、夾餅、當麵包醬等，重口味嘅仲可以就咁大啖大啖咁潷嚟食，放喺屋企看門口，隨時隨地都可以品嚐到海鮮滋味。
銷售點：Ztore士多
