請更新您的瀏覽器

您使用的瀏覽器版本較舊,已不再受支援。建議您更新瀏覽器版本,以獲得最佳使用體驗。

娛樂

【那些年的暑假講四大天王】林海峰:今日嘅後生係「五大訴求」

明報

更新於 2019年09月19日15:10 • 發布於 2019年09月19日15:10
林海峰在棟篤笑以家庭關係比喻香港目前社會局勢。(資料圖片/孫華中攝/網上圖片)
林海峰在棟篤笑以家庭關係比喻香港目前社會局勢。(資料圖片/孫華中攝/網上圖片)

【今晚直擊】林海峰(Jan)在今晚舉行的紅館棟篤笑上,以家庭關係比喻目前香港社會局勢,Jan笑稱:「每個成功男人背後,總有一個偉大女人,而一個失敗嘅爸爸背後,仲有兩個反眼的仔女。

咁冇辦法啦,為咗要聽呢啲屋企反眼聲音意見,要多啲同佢哋溝通,於是乎我決定下次食飯時,我係飾演waiter(侍應):『3位(指妻女)食啲乜嘢,使唔使我介紹吓咁呢?今日我餐廳做緊個非常之特別…哦,唔需要介紹,唔緊要,呢個餐牌隨便睇,小姓林,你可以嗌返我英文名,叫Daddy。』

作為一家之主,你一定要聆聽屋企反眼聲音意見,如果唔係我擔心有日放工返到屋企:『Daddy,你企喺度,你嗰日問我哋食乜嘢呀,我哋話食小籠包,然後你話熱,不如食壽司,點解你次次都要詐帝問我哋?仲有你時時講,話叫我哋食飯時唔可以玩手提電話,你自己食飯時都玩緊手提電話呀﹗『Er…我手頭上冇呢方面資料呀』﹗

咁點解嗰陣時我哋間房要粉紅色,你又一定要全間屋都係白色,同你啲衫灰色同藍色,好悶呀,你知唔知?『等事件平靜之後,對話平台會立即展開』,冇溝通點對話呀?

嗰日媽咪問你沖涼嗰度點解咁大陣尿味?佢問你有冇試過沖涼時小便?當時你答話冇嘅係咪?到底你有冇講大話?(靜默數秒)『做法唔完美,但可以接受,有改善(空間)』。但你唔係答緊我問題呀剛才,你有冇講大話呀?『Er…er…er…』你唔好er呀,講真話呀﹗」此時不少觀眾都大嗌「光復香港﹑時代革命」。

Jan又問道:「咩人講人話係最動聽呀知唔知?」台下觀眾大嗌:「香港人﹗」Jan接著說:「一個正常人講人話係唔好聽,咩人講人話係最動聽呢?就係你知道當中人唔似人,佢講嘅人話係最動聽,OK?

我哋呢啲廢中,成日話欠咗年輕人,但永遠係有欠冇還,所以誠信破產,時時講『我哋做過後生,我哋知』,我哋點會知呢其實?那些年拖手,我最多拖兩隻,我依家見啲後生拖手,係拖條鏈出嚟嘅。

你後生時候暑假點過?咪『四大天王』?今日嘅後生係『五大訴求』呀﹗所以唔好再講年輕人係社會未來棟樑,年輕人唔係未來,年輕人係現在呀﹗」

(即時娛樂)

0 0
reaction icon 0
reaction icon 0
reaction icon 0
reaction icon 0
reaction icon 0
reaction icon 0