請更新您的瀏覽器

您使用的瀏覽器版本較舊,已不再受支援。建議您更新瀏覽器版本,以獲得最佳使用體驗。

運動

【蘇跑旅遊】跨越三國的馬拉松賽事

LINE TODAY

發布於 2019年02月16日02:00 • 蘇兒

Sparkasse 3-Länder-Marathon(博登湖三國馬拉松)係一場跨越三國國境的馬拉松賽事。博登湖(Bodensee)位於瑞士、奧地利及德國的交界處,由三國共同管理。雖然世界上有很多跨國馬拉松,但在同一項賽事裡可以跑遍三國的就僅此一場,舊年我就同朋友一行四人參加呢個比賽。

(主辦單位圖片)
(主辦單位圖片)
(主辦單位圖片)
(主辦單位圖片)

跑道的60%屬於環湖跑,剩下的一部分則是在蘆葦叢和林間。博登湖係歐洲人的度假勝地,風光明媚,而馬拉松於秋季舉行,舒適的天氣十分適合跑步。淨係睇官方相片已經好令人心動,打算旅行跑步嘅你又點可以錯過。

領取賽事包地點:Inselhalle Lindau
領取賽事包地點:Inselhalle Lindau

跑馬拉松係一項消耗大量能量嘅運動,跑手會喺比賽前大量「儲碳」,畀身體有足夠碳水化合物應付比賽。大會好貼心咁為跑手準備意粉晚宴(Pasta party),而且費用全免。意粉係清一色長通粉,配兩種sauces,味道可以接受,要唔要空肚去Expo就任君選擇。提提大家要喺報名時回覆會否岀席party,否則就錯過free lunch機會。食飽飽,可以喺Expo裏面嘅運動攤位行下,換上跑步裝備同參觀專為跑步而設嘅先進科技。

去完Expo一定要留喺德國林道小鎮行下,皆因佢係德國南部「阿爾卑斯山之路」嘅起點。港口嘅獅子雕像同燈塔,以阿爾卑斯山作背景,簡直係影相打卡靚位。

話咁快到咗比賽當日,起跑點位於德國Habour of Lindau(林道港),而終點就係奧地利Casino Stadium in Bregenz(布雷根茨運動場)。前往賽事場地分別可以搭船或火車,比賽選手可以憑號碼布自由乘坐以上交通,往來起點及終點。話說我喺臨上船前一刻,天上突然岀現雙彩虹,係我人生中第一次遇見,so lucky!

(主辦單位圖片)
(主辦單位圖片)

比賽總共有6個香港人報名,即係我哋已佔咗大半數,簡直係陣容鼎盛!跑過幾個海外馬拉松,博登湖馬拉松唔算規模好大,但勝在沿途靚景冇得輸。先由德國岀發,沿住湖邊跑十多公里就到達奧地利,過咗奧地利之後腦海中一直以跑到瑞士為目標,後段到達瑞士,真係好似置身《飄零燕》場景,沿途有好多掛住啷啷嘅牛,仲有見到草泥馬,興奮心情完全麻醉咗腦海嘅攰。

置身飄零燕般的跑道。
置身飄零燕般的跑道。

沿途有唔少樂隊同舞蹈啦啦隊打氣,差不多每5公里就有補給站。補給站飲品多以水、汽水和能量飲品為主,後段路程就有大量energy gel提供,所以跑手無需隨身帶太多gel上路,而有別於其他馬拉松,固體食物供應不多。

賽道方面,沒有太多上落斜,平路為主,而且道路寬闊,與參賽者有充分距離,要創造PB絶對有可能。要注意全馬同半馬分別有關門時間,跑手需分別於6小時及3小時內完成賽事。

(主辦單位圖片)
(主辦單位圖片)
沿途有不少大會拍攝鏡頭。
沿途有不少大會拍攝鏡頭。

每次衝線嘅一刻都有種莫名奇妙嘅感動,今次都唔例外,仲要見證住第一次參加全馬嘅朋友仔完成賽事,真係倍感高興。賽後,朋友話「當你唔跑對腳仲痛過跑,你冇得唔迫住跑。」果然每個人驅使完成全馬嘅動力都唔同。

馬拉松係一項充滿魅力嘅運動,即使再辛苦也急不及待想計劃下次跑岀國嘅行程,未試過係唔知當中嘅喜悅。大會除咗在終點上為跑手戴上獎牌外,仲提供大量生果、能量飲品,仲有啤酒嘉年華,啤酒任飲都唔怕,因為係冇酒精成分。突然想起,人生有個真正朋友的確好極,飲勝!

完成賽事後有啤酒任飲,但就冇酒精成分嘅,飲勝!
完成賽事後有啤酒任飲,但就冇酒精成分嘅,飲勝!

講返點解當初會揀三國馬拉松參加?當然係為咗賽後精彩嘅旅遊活動而嚟啦,話晒呢三個地方有咁多世界遺產,又有岀名山脈,仲有好多秘景湖泊,一定唔可以錯過!嚟緊仲會介紹更多相關當地旅遊嘅資訊,同埋分享下我參加過其他海外馬拉松嘅經驗,LINE Today嘅讀者記得密切留意!

下次比賽日期:2019年10月6日
報名費用(全程馬拉松):65歐元至85歐元(約580港元至750港元)
報名日期:即日至9月25日
報名官網:http://www.sparkasse-3-laender-marathon.at/en/category/sparkasse-3-country-marathon/participant-information-2019/ 
備註:有興趣嘅跑友要趁早報名,因為有早鳥報名優惠

蘇兒(Zoe)
鍾情於打排球同跑步嘅女生,閒時環遊世界發掘美景。期望可以跑晒世界上有名嘅馬拉松。

0 0
reaction icon 0
reaction icon 0
reaction icon 0
reaction icon 0
reaction icon 0
reaction icon 0