名古屋女子馬拉松2019剛完滿落幕，筆者有幸抽中成為參賽者之一，當然要親身去感受呢個大型賽事。該項賽事深受日本及海外女跑友歡迎，去年就有21,915位女士報名參賽，成為全球最多人參加嘅女子長跑比賽。
參賽者要早兩日先到名古屋市東體育中心報到拎選手包，再沿途往名古屋巨蛋參與大型馬拉松博覽會Expo。會場主要分食肆攤檔同運動用品展覽，入面仲有好多打卡位，例如有Tiffany&Co.嘅backdrop同衝終點線，引嚟唔少女跑友排隊影相。
對比上兩星期參加嘅關西泉州國際馬拉松，名古屋女子馬拉松嘅Expo真係好大型，而攤位更以女性市場為主，連美甲服務都有，真係可以行成個下晝。
建議第一日就到博覽會Expo，因為有好多特別紀念品會即日沽清。不過買唔到心水紀念品都唔緊要，完成賽事嘅選手除咗有Tiffany&Co.頸鏈之外，仲有New Balance贊助嘅Finisher Tee同毛巾一條，好有紀念價值。
名古屋巨蛋（博覽會Expo及起點）
交通：由地鐵Yutorito線「名古屋巨蛋前矢田」站步行5分鐘。
比賽當日氣溫只有9度，喺起步後不久就開始落雨，令到氣溫更寒冷。起跑線上有二萬幾名女跑友無懼嚴寒急不及待岀發。由於人數眾多，所以喺上線之前最好預留多啲時間去洗手間。
賽道多數以行車馬路為主，路面寛闊，平路較多，上落斜幅度亦不大。雖然落雨將氣溫再降低，但我無被嚴寒天氣影響，反而越跑越順，仲慢慢提升速度。
跑手可以一路跑步一路欣賞沿途名古屋有名景點，例如名古屋城、大須觀音、電視塔……沿途亦有唔少補給站，有啲更提供名古屋特產小食。大會知道女士都愛影靚相，所以設有大量攝影位置捕捉跑手英姿。
距離名古屋馬拉松比賽前兩星期，我才剛完成關西泉州馬拉松。當日比賽氣溫只有4度，同今次名古屋差不多，所以我好快就適應賽事。名古屋女士嘅毅力同比賽氣氛濃厚，令我深深受到感染，沿途只見不斷向前衝嘅跑手，令自己都唔想停落嚟。而我喺跑嘅過程目標好清晰，就係希望可以Sub 4完成。
終於進入大直路見到衝線位，心裡面突然有種莫名其妙嘅感動，就係見到大會時間係3:55:51（個人時間3:50:06），我真的可以做到Sub 4，成就PB！好多謝老公鼓勵我跑步，沿途無間斷嘅啦啦隊打氣，仲有當地義工，名古屋女子馬拉松真係一個好正嘅長跑活動。
今次比賽，香港歌手盧巧音都有參加，曾患抑鬱症而退隱六年，盧巧音唔想靠藥物治療，於是透過跑步搵到當中快樂，仲由起初練習2至3公里慢慢遞增至挑戰全馬。可能每位跑手背後都有不同嘅故事，但信念都係一樣，就係要堅持。向每位喜歡跑步嘅你加油打氣！
想知道賽前輕鬆旅遊名古屋、睇夜櫻、食饅魚飯……就要密切留意下篇《蘇跑旅遊》。
名古屋女子馬拉松2020
比賽日期：2020年3月8日香港時間早上9點（抽籤登記）
費用：約14,000日元（約980港元）
大會網站：http://womens-marathon.nagoya/en/
名古屋基本資料
地理位置：位於日本本州的中央位置
時區：比香港快1小時
簽證：持有香港特區護照可免簽證
官方語言：日文
撰文及攝影：蘇兒（Zoe）
鍾情於打排球同跑步嘅女生，閒時環遊世界發掘美景。期望可以跑晒世界上有名嘅馬拉松。
