新冠肺炎肆虐全球，最近就有一宗被困秘魯港女事件，令到旅遊達人項明生撰文批評。但其後有人為該名港女發聲，究竟誰是誰非呢？
撰文：SY、KM｜資料來源：項明生facebook、facebook
項明生指責秘魯港女
旅遊達人項明生今日（30日）撰文，指看了TVB及有線電視新聞追訪一名被困秘魯的女生S小姐，在3月5日疫情已蔓延全球下，她仍堅持出發，最後被隔離後，卻抱怨待遇太差。項明生指責該名女生是公主，更指：「去旅行可以去到盡，但就不要輸打贏要。」不少人看到他的帖文，紛紛大罵這名女生不負責任，自討苦吃。但其後開始出現兩極化評論。
原文：
政府包機去接秘魯港女旅客？
昨天看了TVB及有線電視新聞，追訪番前日生果報訪問過的被困秘魯的港女S小姐，真係不吐不快。
一個人去旅行，走出Comfort Zone，需要一個人獨自面對旅途中所有問題，獨自去解決每一道難關，無法怨天尤人，因為這是自己的選擇，與性別身份年齡無關，旅途難關本身就是Backpacking的人生訓練。
S小姐在全球疫症漫延的三月五日，選擇自己一個人由古巴去秘魯Backpack (至於她幾號出發與此無關)，就是「明知外有毒，偏向病毒行」， 就應該衡量過風險丶有被困的心理準備。我很佩服她死都要去旅行的無比勇氣，但對其忽然在鏡頭前公主病發作，恍若兩人：「我 真 的 不 敢 相 信 我 眼 前 的 所 謂 晚 餐 。說真的，真正的監犯也吃得比我好，兩個麵包與一杯像鼻涕的甜麥皮之類的東西。我整個大崩潰……」 「隔離期間三餐都係劣食！」 「我實在不能接受，心靈嚴重受創，這也稱不上晚餐吧？囚犯餐都至少配一個橙，這究竟是什麼鬼。不知道為什麼Hostel有如此安排。」
小姐，你去Cusco住Hostel，以我經驗，大約US$10/晚。而你選擇住 Hostel中最Cheap的房種Dorm (通常十多人同房，睡錄架床，男女混住)，最平只收US$3~5/晚。平時Hostel的免費早餐也只是麵包、麵包、麵包，昨晚TVB影到仲有麥皮牛奶，難道秘魯人民欠左backpacker香檳、三文魚及Parma Ham半熟溫泉蛋嗎？
「我希望香港政府，支付我隔離期間的食宿費用。」
當醫護呼籲大家Stay Home時，你還在秘魯不停呃like影靚相。陽光燦爛的天空之城馬丘比丘獨步絕美，打卡一刻你可曾想到，有咁耐風流？天有不測之風雲，最少都應該出發前自己買個旅遊保險，而不是出事時叫政府同市民幫你埋單吧？
不知什麼時候開始，有港孩旅途遇到問題，就搵個議員要求政府派包機去接送，咁樣全部旅遊保險公司都可以執笠啦！明明自己住緊青年旅社，會抱怨晚餐沒有A5和牛同生蠔龍蝦？同懸掛八號風球就去海邊追浪，要消防員冒生命危險去搶救有什麼分別呢？
做人應該有同理心，我當然同情現在被困海外的每一個香港旅客，不論是團友還是自由行。我也曾經Backpack過十多年，我在秘魯Cusco時曾經去過她被困的Hostel，在斯里蘭卡遇到恐怖襲擊、在俄羅斯俾警察打劫，但是我從來沒有想過要找政府幫手，食得鹹魚抵得渴，自己救自己。
去旅行可以去到盡，但就不要輸打贏要。Stay Home吧，公主~
3月30日12:23am新聞：入境處正安排包機丶接載滯留秘魯港人回港。應該由乘客自費付機票錢，不應由納稅人埋單。記得返港後要入駿洋邨強制隔離14日，日日都係佢口中所謂的”劣食”, 記得付費HK$200/日。
PS：有人將這個Post同政治拉上關係，原來有人去天空之境、Cusco輸出革命，所以屬於不能批評的神。而且去年已經離港，並非3月5日，好在有得FC，請上她的IG睇下，3月4日在香港機場打卡留言” 今次仲唔係放假？” 媽，我好亂啊，放假定輸出革命？
項明生專欄：新冠疫情爆發後的短短三個月，我已經搭了八次飛機
但是有人就找出項明生上星期23號在《晴報》的專欄，該文章題為「去旅行去到盡」，而在文末指「新冠疫情爆發後的短短三個月，我已經搭了八次飛機」，反指他「五十步笑百步」，而且有人在項明生指責港女的帖文下留言，質問他：「呢個2月都仲喺其他疫區，佢好彩就可出嚟做道德偉？」
更有人發現他曾修改帖文，將「3月中去南美」改為「3月中古巴去秘魯」。
有人為秘魯港女反擊
其後有人為秘魯港女反擊，指他的言論失實。
原文：
項明生是甚麼人？舊年反佔中在Facebook扮深黃，同時在微信做小粉紅唱《我的祖國》，今日出post鬧滯留秘魯的女仔係公主，居然可以有咁多人like同share。
1）佢老屈個女仔在3月5日肺炎最嚴重時「明知外有毒，偏向病毒行」，人哋明明係上年年尾出發去南美，你項明生上年就預測到今日會有武漢肺炎？
2）個女仔重點不是抱怨hostel冇好嘢食，backpackers從不care旅行食和牛生蠔同龍蝦，但項明生實在out到爆，3蚊美金的dorm你搵畀我睇，hostel的早餐也不一定是麵包同麵包。先貶低個女仔寒酸，再老屈個女仔奄尖，根本係人格謀殺。
3）個女仔的重點係佢同一班冇檢測的人圍困可以好危險，各國公民在外國出事都可以要求政府救援，點解香港人唔得？個女仔不是要求港府包機救佢一個人，係一大班香港市民滯留秘魯，仲有香港人在秘魯客死異鄉，香港政府乜都唔做佢唔鬧而鬧受緊苦嗰位？
4）大半滯留秘魯的人，包括客死異鄉的阿叔都係參加旅行團，旅行團客就真係最近先出發，項明生點解唔批評呢班客？點解唔批評堅持出團的旅行社？因為佢靠拍旅行社廣告同帶團賺錢嘛，backpackers無權無勢無錢咪俾佢借題發揮囉。
上年在微信一舖清袋，而家想企道德高地攞返彩？慳啲啦。
後記：個女仔的FB page紀錄2019年出發的旅程。項明生的相抄自果籽旅遊個女仔訪問，同一篇訪問寫明個女仔去年年尾出發。
網民反應兩極 究竟誰是誰非？
有網民在該反擊帖文下表示支持，亦有人指港女出發時間混亂，不知誰是正確。
留言 0