朱智賢被爆搭上人夫黎振燁,兩人形象插水。今日朱智賢孖男友謝東閔,在電視城舉行記者會交代事件,期間朱智賢並無鞠躬,亦未向黎振燁的懷孕太太道歉。
舉行完記者會後,朱智賢與謝東閔再接受無綫訪問。朱智賢說自己和黎振燁因拍新劇《食腦喪B》而日久生情,期間她聲淚俱下,但未有向黎太道歉。她說:「我覺得自己唔係一個專業演員,因為拍劇而導致依家咁樣,自己經驗唔夠,演戲經驗唔多,唔夠專業,搞成今時今日,我覺得自己抽離唔到角色,同埋好多謝Brian(謝東閔)呢段時間陪住我,佢承受咗好多,佢畀我更難受更加痛苦。」朱智賢邊說邊用紙巾拭淚。
問到除了Brian外,會否令家人擔心?她說:「我最想同家人講對唔住,唔想因為我自己的事影響到家人,我記得我即時傳短信畀Daddy,我驚影響到佢,唔想家人畀人講閒話,我唔想因為我一人的事,影響到身邊人,同埋我想向同劇演員及監製講對唔住,因為我唔專業,我會連累到大家,我以後會做番好啲,希望大家畀機會我。」
問到會否忟憎自己犯這個錯失?她說:「我真係好後悔及內疚,我都接受唔到自己犯呢個錯。」
主持又問Brian怎樣支持朱智賢?謝東閔說:「佢(朱智賢)唔使工作時,會陪佢多啲,其實呢段日子都唔易過,佢受出面好多壓力,希望呢段時間陪佢走過呢個階段。」
(即時娛樂)