為了迎接農曆新年，CHOCO同一班同事都好努力工作，不斷為大家帶來有用的節日資訊。不過原來聽日就係大年初一，本小姐嘅助手妹妹就投訴一路太忙未有時間去gel甲，現在又已經趕不及book美甲店整，大呻新年冇得靚靚去拜年。其實香港唔少人都做到最後一刻先收爐，係好陰公豬嘅。姊妹們不用怕，CHOCO今日就分享last minute在家美甲小貼士，雖然未必有出去整咁完美，但都可以瞬間令指甲變大方得體。助手妹，開壇示範！
非常重要的打底步驟
要擁有亮麗指甲，除了選對顏色、油得靚，其實指頭的齊整都好重要，所以雖然時間無多，都絕對不能跳過以下打底步驟。本小姐會先用指甲鉗剪走倒刺、甲邊死皮位，然後換上指甲銼按自己喜好修整甲形。千萬不要貪快同用指甲鉗來處理，因為會容易導致指甲斷裂，到時就真係難以補救。最後用護甲油按摩甘皮位置，待軟化後稍微把它推至邊緣位，讓甲形望落更修長。
手殘女小技巧
對於經常去美甲店同埋「手殘」的姊妹來說，自己搽指甲油最怕的就是出界，邊緣位參差不齊盡顯初哥味道。其實又無需過份擔心，因為家中有一樣小物可以助大家一臂之力，就是美工用白膠漿。把它塗在指甲邊緣的皮膚位置，待乾後再油指甲，即使胡亂搽都無問題，因為撕走白膠漿後，出界的顏色就會完美消失。假如想進一步修整顏色邊沿位置，可利用斜面眉刷沾上小量卸甲水慢慢處理。
打造gel甲感
Gel甲除了靚亦有實際用途，其硬塗層加厚了甲面本身，即使新年瘋狂剝開心果都只會整花甲面並不會導致反甲。所以自己塗普通甲油最好都建立起一定厚度，先以base打底，再塗兩層甲油，最後以top coat來作結，營造出gel甲感覺。
趁著距離年初一還有少少時間，希望早前忙到冇時間美甲的姊妹都可以在家塗出心水的開運甲，迎接一個美好的豬年。CHOCO喺度都同大家拜個早年，祝大家身體健康、萬事如意，繼續仙氣迫人！豬年再見！
