昨日下晝影視博覽，TVB宣傳咗十套電視劇。當中出現過幾次宣傳嘅劇，包括咗《白色強人》、4月1日夜晚九點半首播嘅《鐵探》，仲有就連千嬅都問幾時可以播嘅《多功能老婆》。
另外首次有宣傳片或者片花嘅，包括咗：
《機場特警》 - 黃子恆 楊明 張振朗 蔡思貝 湯洛雯 鄧佩儀 朱敏瀚 黎振燁 - 首次以機場特警做主題嘅劇集，似乎都係嗰啲套路，勝在機場同各航空公司支持拍攝，仲有真嘅A380飛機做布景。
《解決師》- 王浩信 唐詩詠 張穎康 張曦雯 陳敏之 馮盈盈 - 玩兩段人生，第一段王浩信係黑幫，第二段係老師仲遇上做老師嘅唐詩詠。家豪哥監製。
《黃金有罪》- 張兆輝 蕭正楠 洪永城 姚子羚 陳瀅 姜大衛 黃智賢 何廣沛 何遠東 梁舜燕 - 主角係張兆輝呀~ 睇片花/宣傳片好睇，王心慰Amy姐有保證。
《極度怪咖》- 王浩信 張振朗 高海寧 馮盈盈 湯怡 蔣家旻 傅嘉莉 姜大衛 石修 賴慰玲 徐榮 許家傑 - 呢個睇預告片睇到好開心，王浩信嘅角色係個演員，亦都係個卧底，似乎係喜劇底嘅警探片嚟，期待。
《殺手》- 陳豪 黎耀祥 李佳芯 龔嘉欣 高海寧 麥明詩 江嘉敏 鄭子誠 何遠東 謝東閔 馬海倫 - 講殺手行業，題材係正，啲造型夠誇，成件事出奇地夾。呢個都期待。
《她她她的少女時代》- 田蕊妮 曹永廉 李思捷 李國麟 韋家雄 袁文傑 羅天宇 林凱恩 余思霆 - 講中年危機，聽落幾老套，但睇宣傳片係睇到毛管棟。阿田事隔一年再接劇，可以話係《女人四十》嘅姐妹作，唔知主持完探討中年女人問題嘅節目，對佢演呢套劇有冇幫助呢？
《法證先鋒IV》- 黃浩然 譚俊彥 朱晨麗 陳煒 李施嬅 張穎康 張曦雯 黃心穎 鄭俊弘 - 經典系列第四輯，可唔可以再創佳績？
你想睇邊套？
撰文：方以文（ig: fongemantvman）
