根據非正式統計，今年可能係香港開埠以嚟史上開得最多台式飲品店嘅一年，仲要每間都大排長龍，熱潮完全冇減退嘅跡象。難怪連台灣人氣食品品牌KiKi都踩過界，推出全新台式茶飲品牌「KiKi茶」，仲選擇喺香港作為起點，連台灣都未有，CONY梗係要即刻去試試！
原來「KiKi茶」嘅成立係由香港一個餐飲集團同KiKi合作，更同時推出另一個餐飲品牌「茶.米」，主打亞洲風味小菜，實行一舖兩用。KiKi茶主打台灣天然茶飲，仲引入咗美國BKON真空萃取泡茶機，唔使兩分鐘，就可以根據不同水溫，經過兩次抽真空，萃取不同濃度和味道嘅茶。
台式飲品茶底固然重要，但係最吸引CONY嘅係佢哋啲珍珠！除咗普通嘅黑糖珍珠，團隊仲研發出川味珍珠、夏枯草珍珠及芋頭珍珠三款口味。要數到最特別嘅一定係川味珍珠，微微辣味愈咬愈突出，不過又唔會嗆喉，好得意！至於夏枯草珍珠真係好重夏枯草味，好有清熱解毒嘅感覺，而芋頭珍珠有啲似迷你粒版嘅芋圓。
鏡頭一轉就即刻由「KiKi茶」轉到去「茶.米」，各類型亞洲菜共冶一爐，由台式拌麵、廣東腸粉、日式釜飯、港式避風塘等，一應俱全。CONY首推「自製手磨米漿滑腸粉」，以珍珠米同東北舊米磨成米漿，夠米香又滑溜。釜飯亦都有驚喜，飯粒分明而且好入味。而「避風塘豬頸肉炒河」炒得乾身唔油，仲好惹味。
除咗主食，餐廳仲提供一系列小食同素食，照顧不同人需要。佢哋仲有提供午市同下午茶餐。整體而言，食物價錢唔算好抵，始終都係位於金鐘高級商場，不過環境舒適，食物質素不俗，菜式設計亦有心思，走精緻路線，又唔會太過油膩，份量比較適合女生，同閨蜜嚟就最啱。
「茶.米」
電話：2117 5903
地址：金鐘道88號太古廣場1樓112號舖
