近排好多餐廳都推出brunch menu，就算係見慣大場面嘅CONY都覺得花多眼亂！近日又有主打懷石料理和廚師發辦的日本餐廳FUMI，推出周六早午餐「All You Can Eat sushi brunch」，每位$450有指定前菜、麵豉湯、甜品兼任食壽司，在8月份更可任飲啤酒、純米吟釀和汽水。平時冇千幾蚊都落唔到樓，今個brunch menu價錢算係好抵食，CONY當然要第一時間去試一試！
坐低冇耐，就有六款小食奉上，包括有米果和魚乾等，唔好以為望落好平凡，其實佢哋平時只會用來招呼VIP，而且係由團隊在日本各地搜羅返嚟，光從呢個細節，都感受到餐廳嘅誠意。
接著，brunch set嘅指定前菜──串燒同雜錦天婦羅都登場啦！串燒共有4款，包括牛舌、免治雞肉棒、雞翼和椎茸。而雜錦天婦羅則由大廚發辦，嚴選當日新鮮時令海鮮和蔬菜製作，CONY當日就有蝦、秋葵、茄子和粟米芯。
任食壽司用料同平時單點的一樣，以築地及其他日本縣市新鮮空運的漁獲，配以新潟縣產的米握製。唔同嘅係壽司嘅size比平時單點的細少少，因為師傅唔想用飯塞飽大家，等大家可以食到更多壽司。
餐牌上12款壽司都可以任點任食，款式有CONY最愛的帶子、左口魚、三文魚同甜蝦，仲有鯛魚、油甘魚、深海池魚、吞拿魚、高知縣鰻魚，以及其他卷物。如果未夠滿足嘅，大家仲可以另加北海道海膽壽司或吞拿魚腩壽司，平時要70幾蚊一件，而在brunch追加只需每件$48。
美食當然要配美酒，本來brunch menu需每位另加$128可任飲啤酒、純米吟釀和汽水，但喺8月份係免費任飲，$450喺中環地段有得任食壽司兼任飲清酒，而且唔限時，最長可以食足3個鐘，對壽司有要求嘅朋友，絕對要bookmark定呀！
FUMI
地址：中環德己立街30-36號蘭桂坊加州大廈6樓
供應時間：逢星期六11:30至14:30
價錢：每位$450
電話：2328 3302
