幾時都話身處香港好幸福，可以食盡世界各地不同菜系和食材，好似今日又有日本岩手縣美食祭開鑼，喺6間日本餐廳都可以品嚐到當地食材烹調嘅美食。
講到日本食材，好多人都會諗起築地、北海道、鹿兒島和熊本等，但原來岩手縣嘅農產和水產都享負盛名。岩手縣位於日本東北地區，是日本最大嘅縣，而且自古以來都以農業和漁業為主。當地內陸地區四季分明、日夜溫差大，種出的蔬果會比較香甜多汁。另一方面，又擁有延綿的海岸線，是親潮、黑潮和津輕暖流3個海流的交匯處，因此漁產豐富，是世界三大漁場之一。
今次岩手縣美食祭帶來多款特產和當造食材，當中最特別嘅要數「海菠蘿」，認識呢種食材嘅人都知道韓國人好鍾意食，但就未必知原來日本都有出產。聽個名唔好以為海菠蘿係一種植物，其實佢係海鮮，係一種軟體動物，外形有啲似菠蘿，作刺身食，口感爽脆，海水味濃郁，並帶有微微苦味。當地還盛產海膽、蠔、帆立貝、魷魚和秋刀魚等海產。
除咗海鮮，岩手縣嘅肉類都值得推介，當地嘅和牛曾獲選11次全國第一嘅高度評價，仲有以粟米和泉水飼養嘅「白金豚」亦曾被日本雜誌評為日本第一。CONY未食勻全日本嘅和牛同豬肉，幫唔到大家證實佢地係咪真係日本第一，不過就知和牛香嫩，而白金豚嘅肉質鬆化，值得一試。
至於蔬果方面，岩手縣首推名為「紅の夢」嘅蘋果，「果如其名」果肉呈紅色，味道酸甜有致，用來製作甜品真係好夢幻。另外，當地亦盛產稻米，當中以「一見鍾情」米產量最多，黏性強而且味道香濃。
想食盡以上用岩手縣食材製作嘅美食就要花啲腳骨力去勻咁多間餐廳啦，不過好在餐廳集中喺銅鑼灣，自問係大胃王嘅你不如挑戰一日食晒咁多美食啦？
日期：即日至11月25日
a. 蟹慶
地址：銅鑼灣軒尼詩道525號澳門逸園中心地庫
電話：2602 1600
b. Moku Moku Yakiton
地址：銅鑼灣軒尼詩道499號永光商業大廈7樓
電話：2886 2062
c. 豊勝手丼
地址：銅鑼灣謝斐道468號百達中心地下D舖
電話：5546 5046
d. 漁獲浜燒
地址：銅鑼灣軒尼詩道525號澳門逸園中心18樓
電話：2575 5677
e. 鳥居居酒屋
地址：銅鑼灣軒尼詩道525號澳門逸園中心17樓
電話：2717 7001
f. 磯野水產
地址：銅鑼灣軒尼詩道525號澳門逸園中心19樓
電話：2766 3678
