火鍋潮流可算是一波未平一波又起，繼四川麻辣鍋熱潮，台式火鍋亦悄悄上位，除了藥膳鍋迎合養生潮流，唔會太辣又可以飲嘅麻辣鍋湯底亦更切合港人口味，而作為本地首批台式火鍋店的品牌「老鍋」，不但在短時間內累積人氣，旗艦店更於12月1日在銅鑼灣開業，仲推出限定湯底及配料，身為火鍋控嘅CONY當然第一時間去試食啦！
旗艦店限定的「美顏蜜瓜響螺花膠鍋」，一聽個名就知好滋陰養顏，最啱又要靚又要食嘅CONY。打邊爐前先呷一口湯頭，好似媽媽啲老火燉湯，清甜潤喉，即刻潷返一碗嚟飲下。細問之下，原來湯底除了蜜瓜、響螺和花膠外，仲加入了沙參、玉竹、杞子及圓肉等，令湯底格外清甜，而且與金華火腿、豬展和雞腳一同熬煮，味道更濃郁。
餐廳又推出一系列全新配料，例如手切肥牛、咸蛋黃炸魚皮和豬血糕等，仲有CONY認為係必食推介的水蓮和紫淮山。由台灣引入的水蓮猶如一綑翠綠嘅幼繩，係客家人常吃嘅蔬菜，用嚟打邊爐涮十幾秒就食得，口感爽脆清甜，又冇草腥味。紫淮山同平時食開嘅淮山口感差不多，不過就更有營養，蘊含大量花青素，有助護眼明目之餘，亦可以抗衰老，幫助CONY保持又白又滑嘅肌膚！
另外，當然一定要試埋餐廳其他招牌配料，例如口感豐腴而肉味濃郁的「美國特級牛肋肉」、奉上時熱辣辣的「鮮炸響鈴」、自家手工製作的「黑松露蝦丸」、「黃金咸蛋黃豬肉丸」和「餃類拼盤」等。
至於飲品方面，餐廳又引進了台灣精釀啤酒品牌「啤酒頭」的13款啤酒，以節氣命名，並以台灣不同元素釀入酒中，例如烏梅、冬瓜茶、芭樂等，味道較甜，容易入口，連唔多飲酒嘅淑女CONY都好喜歡。旗艦店又設有2間貴賓室，適合想擁有私密空間或者同一大班朋友開party嘅人。
老鍋旗艦店
地址：銅鑼灣駱克道491-499號京都廣場2/F全層
電話：2818 6678
