香港人對拉麵的熱情有增無減，一直吸引不少過江龍進駐，而明天又有間殺到嚟！說的就是源自東京新橋、主打濃厚雞湯拉麵的「麺屋武一」。本地拉麵風潮最初以豚骨湯底作主導，後來魚介湯、蝦湯及沾麵等相繼打入市場，風頭均一時無兩。今次又到濃厚雞湯打到嚟，相信又會引來排隊熱潮，雖然店舖明天才開幕，但CONY卻成功潛入店內，為大家率先直撃有咩好食。
麺屋武一於2012年在東京新橋開設第一間店，主打雞湯拉麵，備受注目，在短短6年間已於日本及海外擁有22家分店。他們的皇牌湯底──濃厚系雞湯，以新鮮雞隻熬製13小時而成的雞白湯為基底，再加上以雞骨架、洋蔥、蒜頭、昆布等熬製的清雞湯稀釋，不過經稀釋後依然非常濃稠，口感幼滑creamy。
雞，全部都係雞！
除了濃厚的雞湯，他們的配料還用上雞腿肉叉燒及雞肉丸，整碗拉麵是真正的「雞，全部都係雞」。當中雞腿肉叉燒以和風高湯、昆布、特選醬油等低溫炆煮，口感十分嫩滑。雞肉丸的質感鬆化又多汁，亦是驚喜之作。
蔬菜湯底 素食者都啱
如果想食拉麵又唔想食太濃味，這裡還有以雞骨架、洋蔥、蒜頭、昆布等熬製而成的「清湯系雞湯底」，可選配醬油及鹽味。另外，又有更健康的「蔬菜湯底」，以13種新鮮蔬菜熬製，當中濃厚版更將多款蔬菜打成蓉，加入湯底，令人感覺更加實在和滿足。餐廳又引入低糖質蒟蒻麵，一份只含有18卡路里，另加10元即可轉配。
由於不少男士食完一碗拉麵都會覺得唔夠飽，所以好多日本拉麵店都會推出拉麵跟飯的套餐，這裡雖然冇餐，不過亦有迷你丼飯供選擇。這裡的小吃款式更比一般拉麵店多，除了必備的餃子之外，更有串燒、揚物及沙律。
麺屋 武一
地址：尖沙咀棉登徑13-15號白蘭軒道3號棉登大廈地下A舖
電話：2191 3570
開業日期：5月11日
留言 (0)