唔少人趁新年都會試吓運氣圍埋賭兩手，好似藝人余文樂咁，三年前同「台灣皮帶大王」千金王棠云結婚，嚟到農曆年嘅日子，梗係要去台灣外家拜年，趁住得閒佢仲約咗一班朋友出嚟團拜，當中歌手周興哲都喺度，撞啱其中一個朋友生，但係搞笑地有蛋糕冇蠟燭，余文樂諗到條橋點着個火機扮蠟燭畀壽星吹，都算係幾有急才，之後食完飯就操番兩手啤牌，開頭都係玩吓籌碼，點知愈玩愈認真，余文樂High爆攞個銀包出嚟，露出一奸笑容，慢慢攞成疊錢出嚟擺喺枱面，個樣似係想「晒你冷」，一班朋友聚埋都玩咁大，果然係賭枱上冇友情！最後戰情如何就不得而知，不過周興哲就喺社交度話自己原本贏大錢，不過最後輸番晒，所以過年時節玩吓就好，千祈唔好賭身家呀！
東網網站 : https://on.cc/
東網Facebook專頁 : https://www.facebook.com/onccnews/
