最近深宵時段掀起追劇潮，事關現正重播經典劇《法證先鋒II》，大家又可以睇返視后佘詩曼（阿佘）嘅演技！現年43歲嘅佘詩曼一向出名觀眾緣好，而且出咗名係孝順女一名。佘詩曼媽媽Lily在70年代曾擔任港台DJ，喺阿佘年僅5歲嘅時候，爸爸因交通意外而過身，這些年全靠媽媽母兼父職含辛茹苦搵錢養家，獨力湊大阿佘三兄妹，阿佘為咗報答媽咪養育之恩，現在即使工作再忙都會陪媽咪，又試過喺母親節送車送樓，目的是要令辛苦了半生的媽媽安享晚年，認真孝順！
撰文：Kammy｜圖片來源：佘詩曼@Instagram、佘詩曼@微博、新傳媒資料庫、節目截圖
深宵重播《法證先鋒II》 佘詩曼演英氣女警
依家深宵時段重播經典劇《法證先鋒II》，佘詩曼係女主角之一，喺劇中飾演高級督察馬幗英，同男主角鄭嘉穎（飾演楊逸昇）喺戲中飾演兩公婆。劇外，當年二人就係拍呢套劇而傳出緋聞，更試過風球高掛時於寓所附近遇上狗仔隊，男方情急下叫阿佘落車，事件令二人戀情曝光。
佘詩曼5歲喪父 佘媽獨力湊大仔女
現年43歲嘅佘詩曼有一個哥哥同一個弟弟，喺阿佘年僅5歲時爸爸因交通意外而離佢而去， 佘詩曼媽媽母兼父職，獨力湊大三個仔女，更加供阿佘到瑞士留學修讀酒店管理課程，實在唔容易。而自幼喪父嘅阿佘都好生性，當年喺協恩讀書嘅阿佘自己做功課同溫習，不用母親操心，而為了媽媽不感孤單，阿佘從小就陪媽媽瞓覺直至她十幾歲到瑞士留學。試過有一次，阿佘和哥哥弟弟好想去戲院看電影，但因為當時家境欠佳而未有買票進場，佘媽更為此感到內疚，難得年紀小小的阿佘好懂事，提議去不用花錢的公園玩，真係好乖！
佘詩曼：她是我的好朋友
早前佘詩曼媽媽生日，雖然阿佘現正身在哈爾濱同唔到媽媽慶祝，但佢喺Instagram同微博均有發文祝福媽媽。佢喺微博話：「她是我的好朋友，她是我的至親，她是我的人生導師。今天的壽星女我最愛的媽咪！祝永遠像28的你生日快樂、身體健康，遙遠的祝福！」二人關係十分要好，阿佘絕對係廿四孝囡囡！阿佘亦喺Instagram用英文祝福媽媽，佢話如果自己要喺地球出世一千次，佢希望每一次都係佘媽媽做佢媽媽，「媽咪係我最大嘅快樂」！雖然正日同唔到媽媽慶祝，但媽媽見到一定冧晒啦！
母親生病 阿佘探不得好想哭
現已離巢無綫的佘詩曼自組工作室，長時間在內地工作賺人仔，之前佢接拍內地廚藝真人騷《星廚駕到3》，仲攞埋全季冠軍，令她在內地人氣急升成為搶手貨。不過去年佘在內地節目《說出我世界》中，說出了鮮為人知的經歷，原來2005年有一次她身在北京參加頒獎禮時，卻傳來母親在美國病重的消息，心跳呼吸更停頓了20秒，阿佘說：「當時在台上很想哭，但是我不停的告訴自已，忍住、不能哭，不可以把傷心的情緒帶給觀衆。那一刻我真的很討厭當明星，因為我永遠都要把自己真實的情緒藏在心裏。」而那次後她決定每月要抽時間探望媽媽，再忙也要這樣做！
報答養育之恩 阿佘送車又送樓
因為知道媽媽獨力捱大三兄妹很不容易，所以 佘詩曼 也非常孝順，工作再忙都會抽空陪媽咪過生日及母親節，每年母親節及生日都和媽咪慶祝，她更留言說：「我相信一見鍾情！因為從我出生睜開眼的那一刻，我便愛上我的媽媽了！」
佘媽媽Lily正享受退休生活，在2015年她出席公開活動時曾透露，阿佘曾送上一幢三層高嘅村屋作為母親節禮物，又試過送上名車給她，至於兒子則畀咗一筆錢佢做自己喜歡的事。Lily直言：「以前養大一對仔女好辛苦，目前是收成期，人生去到呢個年紀，最重要係過得好！」看阿佘咁有孝心，相信佘媽媽都深感安慰。
阿佘封視后 佘媽現身送驚喜
2011年，佘詩曼登上福布斯中國名人榜第67名，是首位登上此榜的TVB女藝人。2014年阿佘更憑劇集《使徒行者》「釘姐」一角，連奪「最佳女主角」和「最受歡迎電視女角色」，成為首位「雙料視后」，而長居美國嘅佘媽媽突然現身無綫為女兒送上驚喜，阿佘冇諗過媽咪會現身，驚喜到又喊又笑，阿佘喺台上多謝媽媽一直喺身邊照顧佢，因為自己拍劇壓力好大，成日發媽咪脾氣，但媽媽都一一包容，場面相當感人！
