迪士尼動畫《魔雪奇緣》於2013年上映，當年票房大賣，收入達12.76億美元（約100億港元），電影主題曲「Let It Go」更成為經典洗腦歌，最近大家期待已久嘅《魔雪奇緣2》終於確定會喺11月21日於香港上映，因為時差因素，香港甚至比美國更早上映！
《魔雪奇緣2》嘅故事係繼Elsa繼承王位後，發掘王國艾倫戴爾背後隱藏嘅一個古老、黑暗歷史秘密。與妹妹Anna同妹夫Kristoff，以及小雪人Olaf陪同下踏上一段尋找真相嘅旅程。其中，Anna同Elsa更以新造型登場，刻意令粉絲感受到佢哋嘅成長。
有留意《魔雪奇緣2》嘅動向，都一定知道2月嗰陣官方就已經釋出預告片，預告片見到Elsa、Anna、Kristoff、馴鹿Sven同雪人Olaf一齊歷險，當中更會遇上全新角色－紅髮及金髮嘅女生，有傳紅髮女生將可能成為Elsa女朋友，不過確實關係大家要等到上映入場睇先知～
聲演Elsa、演唱《Let it go》嘅Idina Menzel喺2016年曾謂，如果Elsa係女同志將係「一件好事」。其實之前就有傳迪士尼或會為Elsa安排一位女朋友，導演Jennifer Lee更曾於訪問中透露，好多Elsa嘅粉絲都有討論其性取向，佢表示：「Elsa係一個美妙嘅角色，我哋亦接收到好多對於為Elsa搵女友嘅留言，對此我哋將會認真謹慎思考，主要以『Elsa將要前往何處』、『Elsa嘅生命將要以什麼作為貢獻』為主題嚟討論佢嘅方向。」
雖然未知Elsa最終會同新角色有咩關係，但係Elsa喺續集嘅形象將會大轉變，由長裙變成著長褲、長外套，紮起一把長髮，更會勇於利用佢嘅冰雪魔力，將巨浪化成冰面，猶如超級英雄般解決面前一切障礙，比起從前公主形象，依家變得更為勇敢，令人迫不及待想睇啦！
預告片中，Elsa眼神堅定，脫去外套，嘗試利用佢嘅冰雪魔力嚟越過前方波濤洶湧嘅大海，並將巨浪化成冰面令自己喺上面滑行，無奈海浪太大，三番四次都未能成功。好多網民見到後都欣喜若狂，不斷猜測劇情，紛紛留言「Elsa喺續集中變得更勇敢，我諗佢會去拯救佢喺航海中失去嘅雙親。咁樣一定好好睇，我實在迫不及待啦」、「預告片感覺就似Marvel系列電影般吸引」。
瘋靡全球嘅經典洗腦歌「Let It Go」大受歡迎，唱到街知巷聞，就算無睇過《魔雪奇緣》，都一定曾聽過別人哼出「Let It Go～Let It Go～」，當你以為無其他歌可以再超越佢，你就錯啦！呢次續集主題曲再次搵翻第一集嘅音樂班底，旋律及歌詞方面都會有新突破～
最近為雪人Olaf配音嘅Josh Gad喺節目《Jimmy Kimmel Live》向大家透露《魔雪奇緣2》主題曲嘅洗腦程度絕對會大大超越「Let It Go」：「我認為《魔雪奇緣2》電影主題曲超正，我嘅標準好高，而新歌絕對會更洗腦易記！」令到唔少粉絲已相當期待想快啲聽到～
各位《魔雪奇緣》嘅粉絲就好好期待一下啦！
