藝人蘇韻姿雖然係港姐出身，但喺處境劇《愛．回家之開心速遞》入面飾演熊心如嘅佢就完全冇港姐包袱，仲犧牲色相扮醜添！尋晚一集就話「李莫愁」張詩欣不忿靚女同醜女嘅待遇恍如天堂與地獄，所以利用學生會嘅職權喺校內實施徵收美女附加費，由人工智能系統鑑別大家嘅顏值，愈靚就收得愈貴，而愈醜就會愈多優惠。精打細算嘅「熊心如」就刻意扮醜想慳多啲錢，見佢用冷帽收起秀髮，又將堂眉變成一字眉，仲「生」埋鬚根添，成個Look都真係幾驚嚇！不過蘇韻姿就幾滿意呢個造型，仲影咗唔少相分享到社交網並留言：「心如呢個look真正嘅目的其實係嚟溝女嘅😎😏 #帥帥的 #大帥哥 #imsexyandiknowit #callme如哥」唔少網友都大讚佢呢個Look好正，仲有粉絲話：「如哥你好Man，我有少少鍾意咗你呀😂😂😂」
東網網站 : https://on.cc/
東網Facebook專頁 : https://www.facebook.com/onccnews/
