之前提過《向西聞記》殺出香港登陸NETFLIX（將於 4 月 30 日全球播映），而其實一連 12 集合共 9 個單元的《向西聞記》就率先在 hmvod 上架。由張建聲、陳意嵐、張沛樂 （沙律）和吳浣儀演出的《咖喱雞》，顧名思義就係講張建聲搞女搞到全頸全身都係咖喱雞。而另一單元《碌架床》講述鄧健泓和王宗堯為爭房炒大鑊，老竇林雪爆粗狂剷，夠晒港式地道、當中「日頭中嗰啲，生出嚟嗰啲黑色架」更被網民捧成金句。
《向西聞記》的單元《碌架床》描述一家六口在兩房的300呎公屋困獸鬥，兩兄弟鄧健泓和王宗堯
同老婆兩 pair 人爭房爭廁乜都爭，老竇林雪一鎚定音：「邊X個生個孫俾我，間屋就俾邊個！」兩兄弟一聽完即刻各自捉住老婆入房「做嘢」，進行造人大計。餘怒未消的林雪但又反對兩個仔的「白日行動」，「日頭唔好做呀，日頭中嗰啲，生出嚟嗰啲黑色架，你兩個咁白淨，你問吓你老母吖，我哋晚晚……嘻嘻……」網民勁讚林雪講粗口好好笑，夠晒港式地道、喜感瀰漫。
原來林雪的黑白BB生仔論是拍戲當日即場爆肚，因為林雪向來係「劇本就喺個腦」，消化了角色再自然吐納，他說：「做戲就係做緊生活，我好少家嘈屋閉，但一家人點都有啲拗撬時候，就係因為係一家人，愛之深責之切嘛。」林雪對爆粗亦有其看法：「其實我講粗口唔代表認同講粗口係一件好事，相反好想話畀後生仔女聽，唔好講咁多粗口，因為粗口有時會傷害人，不過粗口始終係我哋一種文化，希望大家當睇喜劇，睇吓笑吓就算。」
而單元《咖喱雞》的故仔是由已播出的《向西》頭兩集單元《畜牲傳心師》延連下去，上回講到《畜》片的張繼聰只愛胡杏兒，苦戀他的陳意嵐（Tarah）情傷之下，在《咖喱雞》故事中搭上已有女友沙律的張建聲（Justin），最後張建聲背正印出軌仲搞到全頸全身都係咖喱雞，呢個咖喱災難比關公災難更難搞，水洗都唔清。
Justin 在電影《作家的謊言：筆忠誘罪》飾演出軌作家，在《咖喱雞》又偷食，接二連三做衰佬角色，但他不怕被定型，「唔諗呢啲啦，其實近幾年我大部分都係演反派，我覺得做到一個位機會嚟先轉型，不如專心反派上點樣做會創新啲，最緊要觀眾睇得爽同開心、入到戲，我就滿足啦。」
張建聲就對這個單元一字記之曰：正。他說：「我一個人要分飾兩個角色，係一個自己同自己講嘢嘅故事，今次最特別反而係同浣儀姐一齊做嘅笑位，出現幾好笑嘅化學作用；呢套戲係我從影以來最多粗口嘅一部，但唔係為講而講，係好生活化，爆粗爆得幾過癮，但我都有另外做配咗一個乾淨版嘅。」
撰文：機
