請更新您的瀏覽器

您使用的瀏覽器版本較舊,已不再受支援。建議您更新瀏覽器版本,以獲得最佳使用體驗。

生活

黃手套之亂過後:香港出色嘅插畫家你又知幾個?

DailyView 網路溫度計

更新於 2019年05月20日05:51 • 發布於 2019年05月20日05:51
黃手套之亂過後:香港出色嘅插畫家你又知幾個?
黃手套之亂過後:香港出色嘅插畫家你又知幾個?

屬於香港人的服藥者聯盟

2019年,香港插畫界發生咗一件驚天地泣鬼神嘅世紀大事,真係可比最近上映嘅《復仇者聯盟4:最終之戰》,只要稍為有留意香港插畫家,都一定會知道呢單史稱「黃手套之亂」嘅傳奇。「黃手套之亂」由Cuson、草日兩位知名插畫家無意間創造出嚟,事源係Cuson係IG放咗佢同女友握手嘅放閃畫作,草日戥Cuson開心,畫咗張圖話佢筆下角色阿三都同想愛人握手,點知握到隻洗碗嘅黃手套,叫佢洗碗。星星之火可以燎原,隨住Cuson基情回應,愈演愈烈,仲有勁多本土插畫家加入戰團,成立咗「服藥者聯盟」,真係好鬼得意!亦都因為咁,令唔少人都話,哇原來香港有咁多插畫家。香港文化咁生鬼,真係好值得我哋有更多嘅關注。今日就等DailyView用網路大數據同你細數香港唔同嘅插畫家,列出最多人討論嘅二十位嘅藝術家。一齊睇睇你最鍾意邊個喇!

DV小教室:香港網路大數據觀測咗近萬個網站頻道(而且不斷增加ing),包括港澳地區的新聞頻道、FB、IG同埋各大討論區、Blog……透過強大嘅網文爬梳觀測,攞到巨大嘅資料樣本數,拎到上億嘅文章及留言訊息,以人工智慧的語意程式做分析。

image source:pxhere/CC0

10 阿塗,純種八十後高登仔

——鵰娜猩!頂硬上!

高登神獸,金翅仆街鳥、麒麟怪、五毛蟷、小學雞,咁多耳熟能詳嘅動物畫作,全部都係出自阿塗隻手!早喺2011年,阿塗已經紅爆高登,仲組織埋關心時事嘅「鍵盤戰線」,力反網絡23條,今時今日我哋仲有得二次創作,佢哋真係出咗唔少心力。除咗神獸創作,阿塗近年往香港文化廣東話嘅題材發展,出咗《圖解廣東話》,仲喺2018年舉辦《廣東話好雙語》個人畫展,相當「貼地」,力撐本土!

image source:Facebook:阿塗

9 爵爵&貓叔,JIEJIEHK

──香港同台灣嘅文化橋樑

爵爵,住喺香港嘅台灣人;貓叔,逗留過台灣嘅香港人,兩個合作插圖設計,至今已經突破咗48萬Likes。當初貓叔去台北實習半年,Fd搭Fd咁識咗對方,後嚟爵爵想出國發展,決定去香港,仲同貓叔做埋同事。亦都係呢個時期,佢哋正式開咗FB Page畫圖,幾經辛苦,終於有今日嘅成就。佢哋嘅創作以「台港文化」為主,好似飲食大不同咁,亦關心公義嘅事,最近逃犯條例都有講,真點香港人!

image source:IG:jiejie_unclecat

8 清潔龍阿德,阿德team

——土生土長唔離地

呢幾年政府做咩都總係俾人負評,但唯獨食環署推出嘅吉祥物,唔理你黃藍紅黑統統都讚好,原因無他嘅,就係廣告公司嘅「阿德team」真係好畀心機,用嘅好潮好in好貼地嘅圖像,塑造咗清潔龍阿德出嚟。阿德宣傳公德,絕對唔係講幾句口號就算,成日都借唔同熱門時事抽水之餘,仲講埋自己嘅理念。2018年佢哋仲創作首非常爆嘅Trap music,上埋台演出,不愧為最正嘅政府吉祥物。

image source:Facebook:清潔龍阿德 Keep Clean Ambassador Ah Tak

7 DDED,Albert&Eric

——設計呢啲,好有意思

留鬚型男Albert同Eric組成嘅設計團隊DDED,對創作相當有熱情,由廣告業轉做個人創作,最初以「偽8-bit」嘅2D平面像素仿電視遊戲畫面,制作惡搞兼諷刺動畫影片,大受網民歡迎。2014年,仲為萬寧設計「龍友大戰萬寧貓」嘅廣告,真係打入埋電視市場,連師奶都話正。2014年打後,DDED仲要由平面設計殺入立體玩具,全部設計都係有香港獨特嘅文化,好似地盤工人咁,唔買都埋嚟睇喇喂!

image source:IG:DDED

6 謝曬皮,TSE SAI PEI

——努力上進嘅幸運兒 

謝曬皮,喺香港插畫界相當知名、受歡迎嘅插畫家,圖文絕不傳統,處處都可見佢獨特嘅黑色幽默同美學風格。佢畢業於香港浸會大學視覺藝術系,因為返工返到個人「謝曬皮」,人生要另尋出口,2012年喺FB開Page畫圖,好多網民做咗佢Fans。香港人有邊個唔係返工返到頹?唔怪得大家都咁鍾意佢嘅。佢話自己係幸運兒,其實佢2015年仲去英國進修,唔會固步自封,呢份努力又點止幸運咁簡單。

image source:Facebook:謝曬皮 TSE SAI PEI the incapable

5 奶茶通俗學,崔氏兄弟

——可能係全世界最好嘅港式奶茶

大佬Haze,細佬Long,兄弟檔拍住上,組成「奶茶通俗學」,誓要將香港獨特嘅奶茶飲食文化宣揚國際!奶茶通俗學,以文字插圖嘅形式,走幽默搞鬼又有美感嘅風格,主力探討港式茶記嘅特色,希望等本地、外地人都知道更多茶記嘅與眾不同,飲飲食食都可以好有深度。正所謂You are what u eat,香港人由細食茶記飲絲襪奶茶大,對茶記自然有幾分家嘅感情。想知呢個家係點?就Follow奶茶通俗學。

image source:IG:milktealogy

4 草日漫畫,梁仲基

──貓貓漫畫,cute!fashion

草日,係香港漫畫專欄家,由1991年到依家,喺好多報紙嘅副刊上面都有連載漫畫,而且咁多年都keep住出書。真係老套D講句,好多香港人都係睇佢漫畫大!草日嘅作品,內容搞鬼,畫風可愛,畫咁多年都帶俾人好young嘅感覺,好啱年青人嘅口味,你睇佢個Facebook page就知,真係人氣高企啊!迎排佢就share多咗自己私人生活,例如洗吓豌啊,散吓步啊,拖吓愛人手仔咁!真係幸福嘅啫!

image source:Facebook:草日漫畫

3 怪叔叔の散步道,Cuson咳神

──重繪人生草圖,再畫戀愛日誌

講起「怪叔叔」、「咳神」,相信好多人都係諗起《我的港女老婆》,無他嘅,話晒個系列都成十年,有回憶好正常。就好似Cuson都冇del到「我的港女老婆」嘅Facebook page咁,無論誰是誰非,兩個人相愛過,到最後都唔應該係傷害,我哋旁觀者嘅,畀咳神知道我哋撐佢就好夠喇!咁點撐啊?快D去like 咗Cuson嘅新page啦,叫做「怪叔叔の散步道」啊!等我哋同怪叔叔一齊重新出發,漫步人生。

image source:Facebook:怪叔叔の散步道

癲噹@貓室,Pam&John

——植根香港,走入國際 

貓室,由Pam和John組成的動畫、插畫、漫畫團體。佢哋相當厲害,出過唔少動畫作品,喺日本,法國、美國、瑞士同韓國等地,都攞過獎!甚至喺亞洲動畫奧斯卡,以香港創作單位嘅名義,奪得全亞洲最高榮譽大獎(grand prize)。講到貓室最知名嘅作品,就係《癲噹》喇。作者經由癲噹嘅創作,希望香港人可以反思對物質同金錢嘅過度執著。香港配音員林保全仲配過主角癲噹嘅聲音,相當鬼馬,未睇要快睇!

image source:Facebook:癲噹 @ 貓室 (din-dong)

香港重機,葉偉青

——直程型過日本高達

葉偉青係香港知名嘅藝術家,做過意馬工作室創作總監,動畫《忍者龜》、《阿童木(小飛俠)》都係經佢出品,畫過香港小說家喬靖夫《武道狂之詩》嘅畫,2018以香港本土文化為題材,創作咗各種唔同嘅機械人,本土系列《香港重機》終於完成!紅VAN、巴士、天星小輪、電車都一一變成機械人,各有特色,係香港人都會有嘅集體回憶,都會有嘅會心微笑。《香港重機2》is coming!大家一定要留意!

image source:Facebook:香港重機

咪話香港無文化,成堆勁爆插畫家

網路而家成日流傳一個用詞「踩港」,形容香港人總係只見到香港唔好嘅地方,不斷貶低自己家鄉嘅價值。其實人嘅常性往往都係貴遠賤近,隔離飯香,外國嘅月亮總係特別圓。如果我哋願意破除呢種唔健康嘅心態,學識欣賞身邊人事物嘅美好,會發現,原來香港都可以好靚,可以有好多有Heart嘅人,創造、捍衛香港文化。以上十個香港本土插畫界嘅服藥者聯盟,每一位嘅創作都係立足香港,眼望國際,關心時事,勇於發聲,不論喺藝術美感,公民正義都相當俾心機,有所豐富成就。黃手套之亂,畀我哋見到香港插畫界多采多姿嘅一面,亦都成就咗歷史傳奇。但喺呢件事之後,呢班藝術家依然努力創作,令本土文化生生不息,好值得我哋繼續支持、分享,為下次嘅傳奇先出一分力。

image source:

image source:

分析說明:

本研究資料由《KEYPO大數據關鍵引擎》提供,分析時間範圍為2018年5月11日至2019年5月12日。

網路大數據系統觀測港澳地區上萬個網站頻道,包括新聞頻道、Facebook、Instagram及各大討論區、BLOG等,針對討論『香港插畫家』相關文本進行分析,並根據網友就該議題之討論,作為本分析依據。

本文分析之結果,非參考投票、民調、網路問卷等資料,名次僅代表網路討論聲量大小,不代表網友正負評價。

0 0
reaction icon 0
reaction icon 0
reaction icon 0
reaction icon 0
reaction icon 0
reaction icon 0