喺港漫當中，好多武林高手都練得一身銅皮鐵骨，講到防禦力最強嘅武學，咁就真係非金鐘罩莫屬喇，港漫作品《龍虎門》當中嘅一代梟雄金羅漢更加曾經以其金鐘罩神功擋住數之不盡嘅機關槍子彈！
金羅漢原名木村哲夫，為經典港漫《龍虎門》當中嘅絕頂高手之一，初登場時已經係羅剎教四大護法之首，師承至德禪師，所使嘅絕技包括如來千佛手、大力金剛掌以及羅漢禪指等，而最厲害嘅武功就同石黑龍一樣，為少林寺四大神功之一嘅金鐘罩！唔同嘅係，金羅漢能夠將金鐘罩練至第十一關，差一關就能夠到達只有達摩先能夠練到十二關功力，當中全靠金羅漢天資優秀再加上苦練所至，完全唔似石黑龍咁靠主角光環屢有奇遇而提升功力。
雖然金羅漢嘅金鐘罩第十一關功力仲差一關先算係頂級，但係已經可以達到刀槍不入、水火不浸之境，金羅漢更曾經憑呢份功力擋住無數機關槍子彈以保護愛妻，及後更將子彈反彈以殲滅敵兵。
東網網站 : https://on.cc/
東網Facebook專頁 : https://www.facebook.com/onccnews/
