請更新您的瀏覽器

您使用的瀏覽器版本較舊,已不再受支援。建議您更新瀏覽器版本,以獲得最佳使用體驗。

生活

香港人新年狂收十大禮物,嘉頓什餅排第幾?

DailyView 網路溫度計

更新於 2020年01月31日01:28 • 發布於 2020年01月29日00:00
香港人新年狂收十大禮物,嘉頓什餅排第幾?
香港人新年狂收十大禮物,嘉頓什餅排第幾?

新年大禮,食到下年

農曆新年,送豬迎鼠,大家買咗咩禮,送咗咩禮,收咗咩禮?拜年送禮,都係一門深奧學問,並唔係咁簡單嘅。試諗諗,每年自己屋企收咁多禮物,自然有好有唔好,最令人頭痛嘅,可能就係收到大量根本食唔晒,自己都唔鍾意食嘅嘢。每年都有會網民分享,睇怕呢堆食物食到下年都存在,真係可以做災難嘅儲備糧食。除咗知名全港嘅嘉頓什餅,其實仲有好多嘢食都係食唔晒嘅。今日就等DailyView同你細數,呢十大新年食唔晒嘅食物,等大家知道下次唔好再買喇!

DV小教室:網路溫度計透過《KEYPO大數據關鍵引擎》,觀測、爬梳港澳地區近萬個網站、頻道,其中包括新聞頻道、各大討論區、FB、IG以及Blog,從中取得資料樣本數,並以AI語意程式作數據分析。「網路熱度」為主題項目相關的網路posts和comments ,數值愈大代表主題項目的討論度愈高。

新年禮盒
新年禮盒

NO.10 蘿蔔糕(111筆)

——仲有十幾底

新年送禮,根據非正式統計,每個香港家庭平均都會收到十幾底嘅蘿蔔糕,成個雪櫃都放滿晒,搞到根本無位放其他嘢!而你要知道,蘿蔔糕可以整嘅方法得兩種,一係蒸,一係煎,無咩特別變化可言。如果唔想浪費食物,又要喺過期之前食晒,就只有一個方法。呢個方法,咪就係每日正餐都要食蘿蔔糕囉!食到反胃,都要食埋佢。

image source:FB/英辰食品有限公司

NO.9 朱古力金幣(152筆)

——點解唔係真金

香港人成日都講一句,錢,邊個會嫌多?但係香港人有一樣嘢就一定唔想收,呢樣就係朱古力金幣喇!朱古力金幣,味道一般,分分鐘仲有銅臭味,放入手就認真難受。加上,朱古力金幣好似成日放咗好耐咁,都唔知幾時過期,好多人都係取個意頭,就放埋一邊。你諗吓,你去人地屋企見到有朱古力金幣,會唔會攞埋食?大家都心照喇!

image source:FB/優品360

NO.8 貝殼朱古力(202筆)

——太甜食唔晒

平日食朱古力,好多人都係一塊起兩塊止,除咗小朋友,好少人會狂食。一嚟對身體唔好,二嚟人大咗唔想食咁多甜嘢,不過呢,朱古力偏偏就成日係送禮首選。新年收收埋埋一大堆,上百塊咁多,根本就食唔晒。其中貝殼朱古力就係好多屋企都會收到,食唔晒放埋一邊,結果隨住年月日積月累,愈變愈多,唔知邊一年先可以清得完呢?

image source:FB/Katie Ying

NO.7 雞精(273筆)

——都係貴價嘢

雞精,雖然有一定價錢,又對身體好,但係呢,並唔係人人都鍾意飲。而且相對其他食品,雞精佔嘅空間都相對比較多,回收又比較煩,令到唔少人收到都幾無奈。如果平時有飲開雞精,都可以當係每日飲一支,始終呢樣嘢唔可以一次飲太多,但總會清得晒。但係當你唔鍾意雞精,唯有諗方法轉送畀其他人,希望其他人會樂意接收。

image source:FB/全家FamilyMart

NO.6 金莎(301筆)

——天神嘅禮物

送朱古力,品牌首選通常都係金莎,呢個品牌已經深入香港民心。金莎,係天神遺落喺人間嘅禮物,咁當然大家作為普通人,都鍾意買呢種有格調嘅金莎。金莎唔單止食得,仲可以摺花花,認真食得又玩得。不過呢,正因為大家都送金莎,自然就搞到無邊個屋企可以清得晒。太受歡迎,都係一種罪名。金莎,幾時先食完?

image source:FB/昕火煙花坊

NO.5 藍罐曲奇(340筆)

——總有一盒喺左近

藍罐曲奇,四種口味,係唔少人細個最愛,但隨住年紀大咗,每年新年都收到一大堆,就認真食唔落喇!每年睇住藍罐愈堆愈多,真係令人覺得好灰心,就好似童年已經過去,青春嘅尾巴都捉唔住咁。不過,如果屋企仲有小朋友,都可以寄望佢哋食晒,well,社會嘅未來就係小朋友。只要相信,總有一日,藍罐曲奇就終於可以清晒佢。

image source:FB/丹麥藍罐曲奇 Kjeldsens

NO.4 年糕(352筆)

——年糕幾時GO

年糕,喺好多心中,佢就等於中國嘅年獸,好多人每到新年,都會特別怕又食年糕。其實,年糕當然唔係唔好食,彈牙又好咬,但當一樣好食嘅食物,不斷咁反覆出現,就會令人出現審味疲勞,就算係龍肉,都食之無味喇。當父母係咁每日一碟一碟嘅攞出嚟,我哋係咁食呀食呀,希望下一餐唔會再有年糕,但事實係總有下一碟。

image source:FB/乐烧肉 Happy2bbq Yakiniku

NO.3 夏威夷果仁(376筆)

——健康小食

夏威夷果仁,大家都知道呢樣嘢好健康,係平時得閒可以食嘅小食。夏威夷果仁含油量高達70%以上,富含不飽和脂肪酸,豐富嘅鈣、磷、鐵,加上維生素B1、B2同人體必需的8種胺基酸。不過就算咁健康,佢都只係小食,唔係正餐,一日最多食5粒左右,食太多會易肥又對身體唔好。照咁食法,可能啱啱食晒,新年又有一堆送禮。

image source:FB/Cheer HK 滋味香港

NO.2 樂家杏仁糖(560筆)

——好食定唔好食

飲食嘅嘢,往往好主觀嘅,睇返網民對樂家杏仁糖嘅評論,有一堆人話好好食,又有另一堆人講自己唔識欣賞。杏仁呢樣嘢,似乎係唔同食品之中,都出現所謂兩極嘅評價。不過無論樂家杏仁糖再好食,始終糖呢樣嘢唔可以食咁多,食得多對身體唔係咁好,要清晒佢,都要相當長嘅時間。大家努力食嘅同時,都記得要注意身體呀!

image source:FB/Almond Roca 樂家杏仁糖

NO.1 嘉頓什餅(639筆)

——受歡迎送禮首選

世界上,最受歡迎嘅嘢,並唔能夠反映佢嘅好壞。雖然大數據反映最多人關注嘉頓什餅,但睇返網民意見,其實對嘉頓什餅真係好多不滿,惡搞嘉頓什餅,改圖改歌寫故仔,樣樣都有。嘉頓什餅,唔係食物咁簡單,仲變成香港人新年嘅笑話,講起嘉頓什餅都會反問對方,睇你幾時先食得完。嘉頓什餅,可能已經係新年最知名嘅品牌。

image source:FB/LIHKG 討論區

【香港網路溫度計調查結果之圖文,未經授權請勿轉載、改寫】

分析說明:

本研究資料由《KEYPO大數據關鍵引擎》提供,分析時間範圍為2019年01月01日至2019年12月31日。

網路大數據系統觀測港澳地區上萬個網站頻道,包括新聞頻道、Facebook、Instagram及各大討論區、BLOG等,針對討論『十大新年食唔晒食物』相關文本進行分析,並根據網友就該議題之討論,作為本分析依據。

本文分析之結果,非參考投票、民調、網路問卷等資料,名次僅代表網路討論熱度大小,不代表網友正負評價。

0 0
reaction icon 0
reaction icon 0
reaction icon 0
reaction icon 0
reaction icon 0
reaction icon 0