早幾日係一年一度的「雙十一」購物節，天生有Shopping基因的兔兔又點會放過呢個血拼的機會。
兔兔同好姊妹Jessica不嬲都好鍾意Shopping，早喺「雙十一」前一個星期已經Mark定有咩要搶購，結果當晚一踏正12點就登入網站掃貨，成功搶到一大堆「筍嘢」戰利品。
熊大：兔兔，年年雙十一你都買咁多野，其實你用唔用得晒架？我見你上年買的食物同護膚品，好多都原封不動郁都未郁過！
兔兔：嘻嘻，雙十一嗰日買嘢真係好筍架，好多網店都會喺呢一日進行促銷大減價，唔少貨品會比平時低至5折、3折，甚至1折都有。我見好多嘢都比平時抵，咪忍唔住放晒入購物車。結果一買就買好多嘢，諗深一層其實好多嘢根本未用完或者買太多用唔晒。
熊大：其實商品價格愈低，人們的需求量就會愈大，經濟學都有解釋到呢個現象，學名稱之為「需求定律」(Law of Demand)。
兔兔：吓！減價促銷都關經濟學事？
熊大：係啊！需求定律係假設所有因素不變的情況下，需求量會隨著價格上升而減少；當價格下跌時，需求量就反而會增加。換言之，根據需求定律，商品價格跟需求量之間存在反向的關係。雙十一期間，唔少網店或者實體店都會進行減價促銷活動，呢種營銷手法刺激到消費者當日的購買意欲大增，最終令消費者不知不覺間買了好多自己根本唔需要的東西。
兔兔：其實咁多商家都喺雙十一嗰日將貨品賣到咁平，會唔會冇錢賺架？
熊大：梗係唔會啦。其實唔少商家都係以先提價後打折的銷售手段，表面上將貨品包裝成促銷優惠，實際上只係包裝個價格，利用折扣將個售價變得有吸引力。其後消費者可能發現，大部分商品的售價相比之前其實唔係平好多。而睇翻當日的銷售數據，商家的收入更係遠遠超過平日的收入一大截，你話佢地點會冇錢賺呢。
兔兔：嘩，原來雙十一打折其實都係氹人買嘢的手段之一，等我仲年年中計買買埋埋咁多嘢。
熊大：咁趁減價買吓嘢其實又冇壞嘅。
兔兔：呀！熊大，我唔記得同你講，其實今年我係拎咗你畀我張附屬卡去掃貨架。
