窮先食麵？錯晒！
以前個個都會話，「冇錢啦，唯有食公仔麵啦！」～但係宜家，食乾拌麵係「Chill」嘅象徵，即使一組價錢要成過百蚊台幣，一向慳錢嘅台灣上班族都依然願意買！有啲仲要冇多幾個錢都買唔到啊！等DailyView網路溫度計用網路大數據排個「台灣十大必食乾拌麵」畀你參考下啦！如果你係乾拌麵fans，下面呢十款一定要同我食晒佢呀！
DV小教室：網路大數據透過 KEYPO大數據關鍵引擎 (keypo.tw)，以國際級的語意分析架構、先進的機器學習技術與人工智慧推論引擎，感知台灣網友語意脈絡與情緒，分析時事網路大數據。
image source:fb/PaMi 曾拌麵
10 細細過就食過嘅阿舍乾麵
阿舍乾麵呢個品牌都算係老牌子，佢喺以前台灣未興賣乾麵就以經跑出來同大家Say hi啦！做咗咁多年，已經有好多香港人知道阿舍乾麵，仲記得以前香港未有咩人做代購嗰陣，勁多人都係唔同論壇度問知唔知邊度有得賣！阿舍乾麵有出幾款麵種，例如外省乾麵，客家粄條同埋台南乾麵，照顧唔同人嘅口味！
image source:gomaji
9 唔係假以時日係賈以食日
點解有個「賈」字？因為呢個品牌係由明星賈靜雯同佢細佬一齊設立嘅～其實呢個品牌喺台灣都好出名㗎！不過可惜就冇咩見到香港人食過啦～佢賣得最好嘅就係麻花麵，用咗特選嘅白芝麻醬同花椒製造。佢嘅包裝仲要超靚超文青！啱晒女仔影相打卡，台灣藝人坤達同柯佳嬿嘅婚禮都喺用佢做賓客回禮𠻹！
image source:Facebook/賈以食日
8 係金博家唔係金箔家
金博家呢個品牌係由歌手曹格嘅老婆吳速玲設立，最出名嘅款式就係「蔥蔥回魂麵」，用咗手工方式日曬嘅關廟細麵，令你食到「索索」聲～佢勁到喺2018年嘅法國藍帶美食協會選為乾拌麵評比第二名，成為台灣第1，亞洲第2！鍾意食辣嘅人一定要試，因為佢哋係用獨門麻辣配方製造醬料包，包你真係食到「回曬魂」！
image source:Facebook/金博家
7 大胃美女研發嘅sui ooh水哦千拌麵
sui ooh水哦千拌麵係由台灣Youtuber「千千進食中」嘅千千開嘅～千千係個大胃王美女，食過珍饈百味嘅佢研發出嚟嘅拌麵又點會唔好食喎！「sui ooh」其實係台語「水喔」，意思係「讚喔」咁解。千拌麵用嘅係台灣在地冇農藥嘅老薑，加上香醇黑麻油，煮出嚟一定勁香！不過香港有得賣嘅地方就比較少見啦～可能大家都要努力搵下！
image source:Facebook/水哦
6 食老媽拌麵要去搵老媽子拌個麵
應該有好多香港人都識老媽拌麵，網上更加有唔少香港人分享老媽拌麵食評！好多鍾意食辣嘅香港人都表示佢呢款麻辣拌麵好香好好味～可以食到辣入面嘅唔同香料味道。老媽拌麵係用台南關廟刀削麵，加埋辣椒、花椒、八角等，最後落埋香菇素蠔油，唔怪之得咁香！依家香港都有得買，大家都快啲去試吓啦！
image source:Facebook/老媽拌面
5 唔係老四川火鍋係老四川拌麵
吓！你哋之前唔係介紹老四川係麻辣火鍋嚟嘅咩！？冇錯，但係老四川最近都開埋拌麵品牌，咁就啱晒心掛掛想食老四川麻辣鍋但係又食唔到嘅你啦！拌麵所附嘅麻辣湯包香辣氣味十足，食辣嘅人一定要試！不過可惜目前喺香港就比較難搵到地方買，可能要去台灣玩嘅時候托多幾包返嚟做存貨啦！
image source:pchome網路購物
4 KiKi拌麵唔係舒淇研發㗎！
連KiKi拌麵都唔識就抵打啦！不過好似好多人都誤會咗Kiki就係舒淇，而呢個牌子就係舒淇創立，其實唔係！KiKi其實係一位男人，但舒淇就真係一直都好中意食KiKi拌麵，所以令好多人都誤會咗～點都好，KiKi拌麵係香港仍然係深受好多人歡迎嘅拌麵，亦都有好多香港Youtuber拍過開箱片試食，令到佢越嚟越出名，仲有好多香港人表示蔥油拌麵係最香最好食㖭啊！
image source:Facebook/KiKi食品雜貨 香港店
3 蘭山麵唔係用山名起嘅
乜有一座山叫蘭山咩？其實「蘭山」係台語，係「散銀」嘅意思。因為佢哋嘅宗旨係希望人人都可以用硬幣就食到好食嘅乾拌麵～佢哋好有要求，主要係接到Order先即做，避免存貨，令個個都食到最高質嘅乾麵！唔講唔知，原來佢好把炮，賣到去全球20幾個國家，銷售突破435萬碗！不過香港就未咁易搵到，要係台灣嘅銷售網送到香港啦！
image source:Facebook/蘭山麵
2 台灣368鄉嚴選製造執覺手作拌麵
呢款拌麵喺香港都比較少聽過～但原來佢喺台灣都係好出名！佢就犀利啦，佢係喺台灣368鄉入面嚴選知名嘅製作廠家去整特調醬料，係經歷咗好多次試驗先搵到最好嘅比例㗎！真係非常認真去研發呀！最多台灣人食油蔥味同億昌麻醬味，身為香港人嘅你快啲去試然後喺香港帶起熱潮啦！
image source:pchome網路購物
1 曾拌麵你唔會未聽過掛？
咁多款拌麵你可以唔食，但係曾拌麵你就一定要食！因為佢真係好出名～曾拌麵已經係乾拌麵界嘅長輩級，知名度好到喺香港都掀起狂熱，個個都去買返至少幾包食。佢用嘅麵種係關廟麵，不過就改良咗變成波浪麵體，所以食落口非常有質感！好多香港人都話每隻味都好好食，完全揀唔落手邊款口味先係第一名！咁高評價你又試咗未呢？
image source:Facebook/PaMi 曾拌麵
分析說明：
本研究資料由《KEYPO大數據關鍵引擎》提供，分析時間範圍為2018年02月25日至2019年02月24日，共一年。
系統觀測上萬個網站頻道，包括新聞頻道、Facebook、PTT及各大討論區、部落格等，針對討論『速食乾拌麵』相關文本進行分析，並根據網友就該議題之討論，作為本分析依據。
本文所調查之結果，非參考投票、民調、網路問卷等資料，名次僅代表網路討論聲量大小，不代表網友正負評價。
