唔知大家仲記唔記得本欄喺去年10月頭（近中秋假期前），講兔兔當時見到韓圜不斷貶值，就係每1港元兌約152韓圜時兌換定唔少韓圜，結果過了差唔多三個月，韓圜竟然升超過3%。以2019年12月31日當日低位，即每1港元兌約147.1韓圜嚟計，兔兔當時將50,000港元兌約韓圜，已經賺了1,665港元。
兔兔有錢賺固然開心，2020年果然係一個好開始。佢發現，其實買賣外幣都係一種唔錯的投資方法。於是，佢想搵熊大了解一吓其他國家的貨幣投資價值。
兔兔：熊大熊大，2019年咩國家貨幣最引起市場關注？
熊大：如果淨係計亞洲地區，泰銖上年就升得最勁。年內泰銖兌美元累計升值近8.7%，升至近6年半新高。
兔兔：點解泰銖會升得咁勁嘅？
熊大：泰銖急升，主要受到幾方面的影響。首先，中美貿易戰及全球經濟放緩衝擊，令國際金價去年大升近兩成。金價急升，泰國作為亞洲新興市場主要黃金交易市場之一，亦可受惠；其次，中美貿易戰持續，令唔少工業生產線逐步撤離中國，並將廠房轉移到泰國等地，推動泰銖的升勢。
熊大繼續說：2019年泰國經常帳順差佔國內生產總值（GDP）比率達6%。經常帳順差，簡單嚟講，即係外資流入多於流出。經常帳順差佔GDP比例愈高，意味外資持續流入泰國推升到匯價。另外，目前泰國外匯存底達2,200億美元，但係當地通脹率持續喺低水平，高外匯存底及低通脹亦是吸引外資的主要原因。
兔兔：泰銖升得咁勁，新年期間我想去泰國旅遊，享受陽光與海灘，咁而家買泰銖咪好唔抵？！
熊大：咁如果你有外遊的打算，但又唔想捱貴Baht（泰銖單位）。建議你可以喺一個最划算的地方兌換泰銖。
兔兔：兌換外幣唔係兌換店或者銀行就得咩？中環間百年出名抵，喺嗰度換唔好咩？
熊大：如果兌換泰銖，應該喺當地泰國機場或者巿區內的橙色SuperRich或綠色SUPERRICH的找換店，兌換率會比喺香港更吸引。假設兌換10,000港元，當地找換店一般可以兌多500泰銖，即係可以食多餐High tea啦。
兔兔：咁短期內泰銖咩價比較抵買？
熊大：如果你新年就要去旅遊，短期內建議兌換價（每1港元兌泰銖）：3.9；賣出價：3.8。
兔兔：原來兌換外幣都有咁多學問！我又上咗寶貴的一課！跟住我要再努力研究有咩貨幣抵買先。
