藝人江若琳早前琳喺社交網自爆頂唔順老公蕭潤邦嘅鼻鼾聲，瞓瞓吓要轉房瞓，搞到蕭潤邦瞓醒以為唔見咗個老婆，打電話畀身邊好友尋人！蕭潤邦為咗老婆唔好再「走佬」，喺社交網自爆買咗睡眠呼吸機，等自己瞓覺時減低噪音：「唔好再怨我有鼻鼾喇！」有個咁為自己嘅老公，江若琳即刻冧番老公話：「你好偉大呀！I Love You！」
蕭潤邦回覆東網，稱幾年前已發覺自己有睡眠塞息症的問題，而前往求醫，檢查過後知道自己情況不算太嚴重，他說：「我唔嚴重，指數唔到去到好高，所以之前未至於要買呢部機，但我成日發夢我塞息，然後醒咗，我老婆話好驚會失去我嘛！所以咪買部機囉。」
此時在身邊的江若琳尷尬得大叫「救命！」他續說經老婆壓力下，最終花兩萬元購下這部機陪瞓，他說：「依家影響到人，費事佢瞓唔到覺，我又唔精神，依家好好瞓，鼻鼾少咗，唔使畀佢煩住，我又充滿力量工作，科技進化咗，覺得OK。都值得嘅，等如人哋買床褥，可以用一世嘛！」他說出了舖後，收到不少朋友關心慰問外，又有不少人向他查詢，他認為優質睡眠好緊要：「以前成日覺得自己有啲渴睡症，因為一直瞓得唔好，所以時時刻刻想瞓。」
東網網站 : https://on.cc/
東網Facebook專頁 : https://www.facebook.com/onccnews/
