近日反修例風波搞到滿城風雨，但被取消立法會議員資格、依家係香港眾志常委嘅羅冠聰卻靜雞雞出走咗去美國。香港飛美國嘅機程大約15個鐘，示威者近日癱瘓機場，好多旅客滯留，究竟羅冠聰用乜嘢方法可以突圍上機呢？抑或佢早喺癱瘓機場之前已飛走呢？
羅冠聰早喺今年3月就講過，暑假會入讀美國耶魯大學東亞研究系，修讀一年嘅碩士課程，課程聚焦中國研究，但冇披露過幾時起行，而佢啱啱喺Facebook貼文話已經抵達紐約，準備去耶魯進修。
佢仲話喺呢個動盪時代出走，唔單止感到惆悵，亦有一股強烈嘅責任感，因為佢以往一直參與國際連結工作，眾志亦喺多年前展開推動「香港人權及民主法案」嘅立法游說，而喺美國呢一年，會推動香港議題嘅敏感度，相信將會有非常多工作展開。
過往羅冠聰曾多次外訪唱衰香港，以佢嘅講法，喺美國呢一年都會繼續做呢啲工作，實行香港美國大合奏喇！
東網網站 : https://on.cc/
東網Facebook專頁 : https://www.facebook.com/onccnews/
