每次同男人Friend出街，首要任務一定係睇靚女。女人分好多種，唔好以為個個男人都好膚淺，淨係識睇樣、睇大波長腿。一般嚟講，我同一班男人睇女仔嘅時候，大概會以下列程度分類：
初級：一兩晚就算喇
中級：做女友就正，但做老婆就麻麻
頂級：娶到佢就正喇！
有種女人外型夠姣夠蘇，一副典型國內網紅打扮，當中又帶點點偽韓風，白滑大眼尖面再附送一吋厚粉。唔係歧視，其實有啲本地人都係咁。花肖低胸上衣或連衣裙，露出戰鬥格嘅招牌波隙兼長腿，未上床已經Feel到如狼似虎、極終欲望禽獸；可惜硬係有一種無法擺脫嘅淘寶感覺，仲係流露隱約嘅風塵味。呢類女人一行出街，基本上所有人都會注意到佢；但講真如果著到咁樣都冇男人望，反而係對佢極大嘅侮辱。作為有理性嘅男人，見到大波長腿固然要例牌升旗敬禮，但你亦知道一旦落床，你哋將無任何文化、思想交流可言，就算想翻雲覆雨多一晚，都分分鐘驚有手尾要跟。所以呢類大波妹，都係試過就算喇。
第二種女仔其實好常見，佢哋都係典型靚女，更加冇所謂網紅味道。不過J還J，講到要拍拖仲要睇好多因素，例如生活常識、識唔識用錢、個人才能等等，絕對唔係有樣有身材就得（公平啲講，其實都有好多男人係得個樣，乜都唔識……）。一剎那嘅激情人皆有之，不過蜜月期之後嘅嘢，就冇人咁擔保喇！
而最頂級嘅「老婆系」女仔，通常未必有係最靚最索嗰堆，喺眾多女人群裡面，第一眼都唔會係最出眾；一過一旦時間耐咗，佢哋嘅魅力反而就會慢慢浸出嚟。每個男人無論幾多歲、搵幾多錢，始終心底裡面都有一顆小朋友嘅心，鐘意被人體貼嘅感覺：鄰家女孩、貼地feel，絕對畀到男人安全感。
當然啦，男人唔係要搵一個全天候照顧自己嘅工人，但生活上可以互相交流、價值觀能夠配合，呢啲先係共同建立家庭嘅必要因素。能夠搵到一個持家有道嘅賢淑女子，有時真係幾大波都比唔上……當然有埋就更好啦。
**Follow us on:
- Facebook: CosmoHK
- Instagram: @cosmopolitan_hk
- YouTube: CosmopolitanHK**
