香港人，健身！
香港人，可能係全世界最缺乏運動嘅民眾，周不時都會有都市病纏身，周身骨痛都唔知點算好！其實咁樣折磨自己都唔係方法，日捱夜捱，隨時老咗搵得個錢，但都無福消受，有錢都都無埞使喇！「秒速捉得緊了／而皮膚竟偷偷鬆了／為何用到盡了至知哪樣緊要」，歌仔都有得唱，千其唔好令自己人生只窮得剩下錢。今時今日，加埋治安都唔太好，最啱香港人嘅Keep fit方法，梗係練武喇！唔單止可以訓練體能，操出嚟個身型又靚，仲要睇得又打得。今日就等DailyView用網路大數據同你細講，香港二十間最出名嘅拳館，畀大家可以即刻去拜師學藝。
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
image source:
image source:
10 海洋泰拳會（600筆）
——Think it And Do it
Ocean Muay Thai & Fitness，有中港澳多項國際泰拳大賽冠軍，香港五屆金腰帶拳王洪友海師傅親自主教，咪話唔吸引！佢哋入面嘅教練，好似文Sir咁，一直都有積極參加唔同嘅比賽，早排先打完KF1 Fight 32之決戰天下，唔怪得咁Fit。佢哋嘅熱情，感染到好多學生，大家教學相長，真係好熱血！好多學生都話佢哋教學細心，無壓力，大家如果對泰拳有興趣，就記得留意佢哋喇！
image source:
9 DEF BOXING（601筆）
——收生爆滿
出街食飯，點樣睇一間餐廳好唔好食？未必要上網睇食評嘅。最直接、實際嘅觀察，一定係睇睇間店入面有幾多食客，佢哋食得開唔開心喇！DEF BOXING最把炮嘅地方，就係佢收生爆滿，早排仲話「拳擊基礎班深受歡迎，經常爆滿，所以DEF Boxing於7月22日起，將加開更多課堂」。見到呢間店咁多學生，原因無他嘅，因為DEF Boxing教得好，一傳十，十傳百，咪個個都去囉。
image source:
8 Power boxing gym（648筆）
——拳王坐陣
一間拳館，最緊要嘅係咩呢？唔係設施，唔係價錢，而係教練！如果有一個好嘅教練，識得因材施教，當然先會令學生有所進步。如果教練唔識教，學生學得唔開心，又大壓力，隨時慘過無學。Power boxing gym絕無呢個問題，皆因有拳王王偉明教練坐陣，連續六年取得香港男子60kg及64kg拳擊冠軍，連續九年香港傑出表現教練、卓越教練獎同比賽表現出色獎等。勁到無嘢講！
image source:
7 青聯康體會（682筆）
——簡單淺易
學功夫，個個都知有益身心，但又唔係好多人學喎。點解？皆因香港人人怕辛苦、怕困難，返工返學已經充滿挑戰同壓力，仲要放工放學去折磨自己，當然Say no喇！不過呢，青聯康體會就打破咗呢個定律，佢哋已經將原本艱深嘅泰拳運動，深入研究同改良之後，用簡單淺易嘅方法教導學生。近年佢哋唔止教泰拳，仲有埋巴西柔術，各位香港人想輕鬆學？呢間絕對值得一戰！
image source:
6 Korea Taekwondo Cheung Do Kwan（688筆）
——韓籍教練
Korea Taekwondo Cheung Do Kwan 韓國跆拳道青道館，係一間嚟自韓國嘅跆拳道道館，佢哋入面仲有韓籍教練，真係好犀利！禹鍾弼館長有黑帶八段，功力高深，有佢坐鎮，一定係強將手下無弱兵，教出嚟嘅弟子個個都武功高強。好多家長都評價好好，話佢哋嘅教練好Nice，又Professional，仲識得因材施教。如果各位有細路仔，又想佢哋身體好，記得一定要嚟呢間青道館。
image source:
5 倉田保昭空手道館（829筆）
——嚟自日本
日本名，空手道，一聽就知呢間道館相當正式，唔係一般街邊貨色可比！倉田保昭空手道館總部設喺東京世田谷，日本出名咩？高質囉！佢哋一流嘅師資，有唔少都係直接由日本過嚟。日本師父透過嚴厲嘅心態，輕鬆嘅教學培育門生。創始人倉田老師仲對香港有好深感情，視香港為佢嘅第二故鄉。倉田老師希望透過空手道，希望令大家成為一個剛柔並重、不怕困難同頂天立地嘅人。
image source:
4 麒拳館（884筆）
——輕鬆學習
位於尖沙咀，成立於2012年嘅Spirit Muay Thai & Fitness 麒拳館，係一間聲譽良好嘅拳館，絕無任何入會費，推銷簽約，香港人上去大可以放心喇！麒拳館唔同傳統嘅拳館，除咗有泰拳課程，都開咗唔同類型嘅運動課程，包括Weight Training(重量訓練)、HIIT(高強度間歇性訓練)、Functional Training(功能性訓練)等，如果怕一上嚟就學得太辛苦，不妨可以先諗諗其他課程入手先。
image source:
3 東泰格鬥（990筆）
——CP值高
東泰格鬥成立於2011年，喺旺角塘尾道同彌敦道都有開店，主要教泰拳、MMA課程。東泰格鬥嘅特別在於，佢哋主打平民價格，有大量優惠，trial 試堂優惠期$100，一人或兩人即可享有，要視乎返唔同課程嘅情況。之前仲推出$800 無限任上課程，單對單私人教練，無論係想養生修身系，鍛練理想身形，定係走格鬥技術系，提升泰拳/MMA /Boxing技巧都得。咁抵，點到香港人唔報名？
image source:
2 仲間柔道會（1172筆）
——風火山林
如果係香港嘅八、九十後，細細個一定睇過電視播TVB嘅《撻出愛火花》，謝霆鋒使出一招超必殺技「風火山林」，咁鬼霸氣，認真迷倒無數青少年。好多後生仔因為咁想學柔道，興起咗一股風潮，至今未止。仲間柔道會係香港最為知名嘅柔道拳會，佢哋嘅宗旨係提高參加者柔道技巧，培養自律性、合作精神、學習忍讓同禮節，用柔道付出血汗，建立手足之間嘅友情。哇，真係男人浪漫！
image source:
1 富德拳館（1986筆）
——職業水平
富德拳館，由一代宗師江富德成立。江富德乃香港泰拳及搏擊運動嘅傳奇人物，曾和世界各大高手比拼，實力高強。「打而優則授」，江富德喺1982年成立富德拳館，喺世界有各地皆有門生，成千上萬。門下學生喺公開比賽多次取勝，連而家好多香港嘅拳館教練，本身都出自富德拳館，認真可以話係香港拳擊出富德。富德拳館嘅老字號，代表咗職業水平，絕對真材實料，難怪成為第一名喇！
image source:
分析說明：
本研究資料由《KEYPO大數據關鍵引擎》提供，分析時間範圍為2018年11月14日至2019年11月13日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『香港拳館』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。
