今日嘉賓農夫扮激情男🤣🤣🤣 #prettycrazy容祖兒演唱會 #joeyyung #容祖兒 #prettycrazy
A post shared by @jo.jo.land on Aug 18, 2019 at 7:45am PDT
踏入第14晚，容祖兒開心笑道：「聽日可以放假！今日阿姐好高興決定賣大包！」，登上自己名命為「紅磡360」的高空纜車跟歌迷大唱K，當中又在山頂撞到來睇騷的弟弟容逸恆，兩姐弟一同對唱，十分開心，繼而又在人群中找到「農夫」，三人大合唱《特別嘉賓》令觀眾驚喜萬分。
A post shared by @jo.jo.land on Aug 18, 2019 at 7:55pm PDT
農夫上台大展搞笑本領，如同搞一個小型棟篤笑，令觀眾及祖兒由頭笑到落尾，拍爛手掌。農夫一開始就玩大踢爆，「其實扮咩驚喜，大家一早知我地係今晚嘉賓啦，好多人收到whatsapp 嘉賓 list ，你地都知啦，下場係草蜢！」C君: 「我收到，18號農夫，我睇到幾嬲！」引得觀眾哈哈大笑之餘又歡呼納喊歡迎他們。
祖兒話：「我一早就已經決定請你哋做嘉賓㗎啦！我覺得你兩個好OK㗎！兩個天生一對，一個咁高，一個冇咁高；一個長期唔夠飯食，一個食埋佢個碗飯。」陸永：「搵我哋咁樣先夠crazy係咪？ 你之前全部巨星，原來容祖兒你真係痴線㗎！ 」C君: 「我作為你嘉賓，要同全場觀眾負責，好想講一聲：『對唔住，好抱歉。』你諗吓，大家之前睇個啲張學友、劉德華、古天樂，跟住今晚係農夫！你話點算呢真係！」祖兒就叫農夫聽吓觀眾的反應，觀眾紛紛狂歡呼撐農夫，但他們就笑道：「今時今日鬧到讚啲聲係差唔多⋯⋯」C君繼續話：「我抱歉自把自為應成祖兒做嘉賓，我哋應承大家多一件事，今晚我哋不再唱任何歌，不再折磨你哋聽覺，請放心。」然後兩人一同抵死唱《刻不容緩》：『我無自信，人云亦云』，所以我哋兩個咪係娛樂圈度『 庸庸碌碌半生』，觀眾報以熱烈掌聲。
C君再講：「如果在座任何朋友想退飛，唔需要唔好意思，我自己都退咗，我睇到今晚嘉賓農夫，我幫你哋諗埋，你點面對睇之前個啲嘉賓啲觀眾，你諗吓一齊食飯，你朋友問，你嗰晚邊個嘉賓 ，人哋話張學友，你話農夫，幾難聽，兩個垃圾。」祖兒笑到收唔到聲，唔識回應，只好說：「你哋唔好咁樣話自己，千錯萬錯，係我錯。」陸永：「你哋唔好怪 Joey，佢係我認識最錫歌迷嘅歌手，佢錫嘅程度係非常crazy ，crazy到自己假期不要，補番場畀你哋！咁錫你歌迷，咁今晚係咪要補？咁嘅嘉賓，嘉賓衰成咁梗係要補啦！」又引得觀眾哈哈大笑之餘更熱烈起哄歡呼！C君：「大家知道，容祖兒pretty crazy演唱會其中最crazy就係盡量希望唱多啲歌畀大家，真係pretty超時！有數得計，每晚大慨罰五萬，做完場騷，最少都罰一百萬。嘩！係我就唔唱啦！我最想試吓八點半開騷，我八點九散場，測試下紅館over要補水，咁under有冇得回水？」陸永：「容祖兒你點解咁對歌迷，你簡直係荼毒香港樂壇，你開演唱會開成咁，咁大製作，叫人哋以後點開演唱會？睇過呢個騷，重點睇其他騷？ 」然後反問觀眾: 「所以好多人都話最好睇演唱會係邊個？」觀眾狂叫 :「容祖兒 ！」農夫就叫觀眾齊齊「舉高隻手」，大合唱《舉高隻手》作結。
農夫離開後，祖兒就好開心同觀眾講：「我想話畀大家聽，我好努力做咗14場，明日我放假。今日阿姐好高興決定賣大包，演唱會每晚我都會唱人哋歌，滿足自己慾望，今晚準備咗一首我好喜歡的歌畀大家，希望大家會鐘意這首歌，然後祖兒唱出《祝君好》。在觀眾沒有心理準備之下，張智霖突然升上台同祖兒合唱，無端端又多個靚仔嘉賓睇，觀眾都開心到飛起，瘋狂大叫，祖兒就話：「今日想請大家食多粒糖，唔係我想請就得，要請得郁先得，大家畀多啲掌聲多謝張智霖！」兩人在台上更披露不可告人的秘密，Chilam話：「我哋兩個關係，正所謂遠親不如近鄰！」祖兒：「今日披露大家知一個秘密！你哋唔好同人講，我哋係同居關係！哈哈！不過，同居不同層！我哋住同一大廈，見得佢最多係停車場同電梯，同舞台真係第一次！好多謝Chilam，佢拍緊賀歲片，請幾個鐘假來支持我，重攜眷出席，老婆靚靚都來埋睇騷！真係多謝佢一家。」Chilam話：「我有個小秘密想話你知，我個仔撞到你幾次，佢好怕醜，你出咗電梯，佢就問我：『 who is she？』我答佢：『she is a diva！』香港天后，i’m proud of you！係緣份令我哋friend咗咁多。」祖兒見觀眾咁興奮，就拉住Chilam唱多首歌，「大家咁開心，我帶個靚仔一齊同你哋握吓手，再唱吓歌啦。」然後兩人同觀眾一同合唱《歲月如歌》氣氛熱鬧。
撰文：機
