歌手洪卓立（Ken）今日上電台宣傳新歌《喜劇收場》，歌意講述成長、感激過去曾發生的開心、傷心事。講到有網民對號入座，指新歌道盡跟前女友湯怡的拍拖事迹，Ken坦言每人解讀都好主觀，若然此諗法可以令大家更投入去聽歌，自己都不介意：「其實由《數寄屋橋次郎》、《鬚根》到呢首歌，都冇話要影射任何事，本來都唔想做情歌，但無論做咩歌啲Fans可能都會套用喺我身上，例如話我強顏歡笑扮冇嘢，所以最後都照做，應該做咩就做。」
壓力大爆粗鬧阿媽
Ken憶述過去其中一件傷心事，是入行初期因唔識解壓，而用四字真言粗口鬧媽媽：「都甘嘅！鬧完媽媽嬲到喊，之後我又一齊喊，當時好多嘢做，佢嘅一句善意問候都覺得煩。（點氹番媽媽？）請食飯，屋企唔係好典型會講『我愛你』。」
講到疫情下的工作安排，他指有內地電影要暫工：「拍咗十分之一，依家都唔知幾時都再開工。（會唔會Sharp Cut停？）唔會嘅，希望遲少少、穩定番先開，始終都多人。（至於個唱？）都係繼續延期。」
東網網站 : https://on.cc/
東網Facebook專頁 : https://www.facebook.com/onccnews/
